Spanja nis së shpejti lehtësimin e masave kufizuese – Kryeministri Sanchez: “Tashmë e kemi arritur kulmin” e pandemisë

Spanja së shpejti do të fillojë procesin e de-përshkallëzimit të masave aktuale të bllokimit për të zbutur pandeminë e koronavirusit në vend, tha sot kryeministri spanjoll Pedro Sanchez, pasi ai i kërkoi Parlamentit të aprovojë kërkesën e tij për të zgjatur gjendjen e jashtëzakonshme të vendit deri me 26 Prill.

“Ne kemi arritur kulmin dhe tani fillon de-përshkallëzimi,” tha Sanchez në Parlamentin Spanjoll gati të zbrazët të enjten, pasi shumica e ligjvënësve po punojnë nga shtëpia. Ai paralajmëroi megjithatë, se rikthimi në jetën normale do të ishte “graduale”, në përputhje me ashpërsinë e krizës aktuale shëndetësore. “Ngjitja ka qenë e vështirë, ashtu siç do të jetë edhe zbritja.”

“Ne po përballemi me kërcënimin më të madh për shëndetin publik të planetit që nga gripi i vitit 1918,” tha Sanchez, duke sqaruar se rifillimi i aktivitetit normal do të ndodhte vetëm në faza. “Gjëja e fundit që duhet të lejojmë është një hap prapa sepse kjo do të ishte më shumë sesa një pengesë” por “do të ishte një rikthim”, për virusin.

Kreu i qeverisë spanjolle vazhdoi të thotë se “Europa nuk mund të lejojë të duket ndryshe”, kur bëhet fjalë për COVID-19 dhe u bëri thirrje krerëve të shteteve të bashkohen dhe të avokojnë për një përgjigje të bashkuar europiane ndaj krizës. “Bashkimi Europian është në rrezik nëse nuk ka solidaritet kundër virusit.”

Kryeministri Spanjoll u tha deputetëve të opozitës se qeveria e tij po “punon një plan” për të sjellë ngadalë vendin në një formë ose “normalitet”, por paralajmëroi: “Ne as nuk mund ta dimë se në çfarë lloj normaliteti po kthehemi. ”

Spanja ka qenë vendi i dytë më i prekur në botë nga pandemia koronavirus deri më tani, pas SHBA. Pothuajse 150,000 raste të konfirmuara të virusit janë zbuluar dhe numri i vdekjeve aktualisht është 14,792.(CNN)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.