Spanja shton optimizmin – Rrit projeksionet për ekonominë, pas të dhënave të T1

Ekonomia spanjolle projektohet të rritet me 2.7% përgjatë këtij viti, projekton qeveria e vendit, që ka rritur objektivin. Më parë, qeveria projektonte një rritje ekonomike prej 2.5%. Ky rishikim erdhi vetëm disa orë pas raportimit të të dhënave të fundit të rritjes ekonomike gjatë tremujorit të parë të vitit, që flisnin për një rritje pranë 0.8%, ndër më të fortat në Eurozonë.  Por, ministri i Ekonomisë ka folur për një objektiv edhe më ambicioz.

“Nëse në marrim për bazë vjetore, normën e rritjes në bazë tremujorësh, atëherë flasim për një rritje që shkon mbi 3%”, nënvizoi Luis de Guindos, ministri spanjoll i Ekonomisë. Sipas qeverisë, prodhimi i brendshëm bruto do të zgjerohet mesatarisht me 2.5% deri në vitin 2020.

Mundësia që ekonomia spanjolle të rritet mbi 3% është e lartë, sidomos po të kemi parasysh se, Spanja gjatë viteve të fundit ka mposhtur edhe projeksionet më optimiste nga institucionet ndërkombëtare.

Ndër të tjera, vendi synon të ulë deficitin publik në 0.5% dhe borxhin publik në 92.5% brenda vitit 2020.

Papunësia projektohet të bjerë në 11.2%, nga 18.75% që është aktualisht.

“Spanja është kthyer të jetë konkurruese. Kjo është një shenjë se modeli jonë i rritjes, është i qëndrueshëm”- deklaroi ministri i ekonomisë në vend.

Roel Kokrkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.