Spanja, zgjidhja e krizës energjetike – E ardhmja kalon nga vendi iberik, por duhet ndërtuar çdo gjë!

Kriza energjetike po godet fort në Europë, por për disa vende rrezikon të shndërrohet në një mundësi: ky është rasti i Spanjës dhe Portugalisë, të cilat, me pothuajse zero varësi nga gazi rus, po rezultojnë në pozicione avantazhi strategjik në Europë.

Lider në sektorin e energjisë së rinovueshme falë investimeve në energjinë e erës, diellore dhe hidraulike, të dy vendet janë gjithashtu në krye të infrastrukturave për ruajtjen dhe transformimin e gazit natyror të lëngshëm, i cili mund të zëvendësojë një pjesë të furnizimeve ruse.

Kjo është veçanërisht e vërtetë për Spanjën, e cila me impiantet e saj të rigazifikimit, ai në Barcelonë është më i madhi në Europë, është në gjendje të thithë sasi të gazit natyror të lëngshëm, që janë pak më pak se ato të menaxhuara në pjesën tjetër të kontinentit.

Sipas ekspertëve të sektorit gjashtë impiantet në Spanjë menaxhojnë 40% të kapacitetit total të Europës kontinentale. Pasja e kësaj lloj infrastrukture në sistemin e gazit shton fleksibilitetin dhe forcon furnizimet në krahasim me sistemet e tjera të vendeve europiane  të cilat varen totalisht nga infrastruktura si për shembull tubacionet e gazit.

Kjo është arsyeja pse Spanja do të kalojë pjesën më të madhe të gazit natyror të lëngshëm që Uashingtoni i ka premtuar Europës për të lehtësuar varësinë nga Moska: eksportet në anën tjetër të Atlantikut pritet të rriten me 15 miliardë metra kub këtë vit, me dërgesa edhe më të konsiderueshme në të ardhmen.

Problemi do të jetë më pas rishpërndarja e tij në pjesën tjetër të kontinentit, duke pasur parasysh se lidhjet janë të pakta: Spanja dhe Franca aktualisht ndajnë dy tubacione të vogla gazi që mund të transportojnë ekuivalentin e shtatë anijeve me gaz natyror të lëngshëm në muaj, ndërsa Spanja priti 27 të tilla në terminalet e saj në mars, përveç gazit natyror të pompuar përmes tubacionit algjerian.

Ndërkohë, në Madrid dhe Bruksel flitet për rinisjen e një plani për ndërtimin e një gazsjellësi më të madh për gazin hidrogjen dhe energjinë e gjelbër që kalon Pirenej, por edhe nëse projekti do të financohej, do të duheshin vite për të filluar punimet.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.