Specializimet në mjekësi, këtë vit konkurrojnë 279 aplikantë për 185 vende

Për të tretin vit radhazi, janë hapur specializimet për të gjithë studentët e Mjekësisë që duan të vijojnë studimet e Nivelit të Tretë. 185 janë  kuotat e përcaktuar këtë vit, ndërsa janë regjistruar për të garuar 279 aplikantë.Ministri i Shëndetësisë, Ilir Beqaj, i shoqëruar edhe nga Rektori i Universitetit të Mjekësisë, Prof. Dr. Arben Gjata, ndoqi nga afër ecurinë e procesit.

Ministri i Shëndetësisë Ilir  Beqaj e vuri theksin tek vijimësia e këtij procesi, duke shtuar se këtë vit, procesi i përzgjedhjes së specializantëve në mjekësi po bëhet në bazë të Ligjit të ri të Arsimit të Lartë.

“Ka filluar sot procesi i përzgjedhjes së specializantëve në mjekësi, apo studimet e nivelit të tretë në mjekësi, siç quhen dhe ndryshe, në përputhje dhe me reformën, tashmë në zbatim, të Arsimit të Lartë. Është viti i tretë që vazhdon të ketë specializime të reja në mjekësi, gjë që, së pari, na ndihmon për të plotësuar boshllëqet e krijuara në trupën mjekësore me specialistë në të gjithë vendin”, nënvizoi Beqaj.

Nga ana e tij, Rektori i Universitetit të Mjekësisë, Prof. Dr. Arben Gjata, u shpreh se  është viti i tretë që zhvillohen konkurset.

“Është viti i tretë që zhvillohen konkurset. Është një risi, sepse kemi tre vjet rresht që vazhdojmë të marrim specialistë. Nuk ka pasur ndërprerje siç ka ndodhur në vitet përpara. Risia e këtij viti është që gjithë organizimi kalon në Universitet mbi bazën e Ligjit të ri të Arsimit të Lartë”. risi sivjet është, gjithashtu, që dhe intervista që po merret bëhet mbi bazën e një skeleti të përgatitur, ku të paktën të gjithë komisionet të kenë të njëjtën skelet pyetjesh që të mos kemi diferenca vlerësimesh me qenë se janë shumë komisione”.

Faza e parë e testimit, ajo e intervistës me gojë u zhvillua me 19 komisione të përbëra me nga 6 anëtarë të cilët  bënë vlerësimet për të gjithë kandidatët pas seancës së pyetje-përgjigjeve.

Entela Barjamaj/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.