Spitali i ri i sëmundjeve interne – Lëvrohet huaja 242 mln lekë. Do të ulet kostot për trajtimin e pacientëve
Ndërtimi i godinës së re 7-katëshe të mjekësisë së përgjithshme në Qendrën Spitalore Universitare “Nënë Tereza”, do ti kushtojë shtetit shqiptarë mbi 1.19 miliardë lekë. Financimi për ndërtimin e kësaj godine do të jepet nga Banka e Zhvillimit të Këshillit të Europës në formë huaje. Konkretisht gjatë vitit 2018 do të lëvrohet një pjesë e huas në vlerën e 242 milionë lekë që do të shënojë edhe nisjen e punimeve.
Më herët është bërë shpronësimi i pronarëve, me një vlerë prej 9 milionë lekë të paguara nga të ardhurat e QSUT-së. Në dy vite në vijim do të kemi një rritje të vlerës së lëvruar të huas, respektivisht në 2019 vlera do të jetë 282 milionë lekë dhe në 2020 do të jetë 270 milionë lekë. Ndërkohë që pas këtyre dy viteve parashikohet që të financohen mbi 397 milionë lekë.
Me ndërtimin e këtij spitali do të bëhet e munduar që të gjitha repartet e sëmundjeve të brendshme si kardiologjia, hemodinamika, nefrologjia të jenë në të njëjtin vend me shërbimin e mjekësisë interne. Referuar projektit për herë të pare do të kemi një spitali ditor brenda kësaj strukture, me 60 shtretër, i cili do të reduktojë shfrytëzimin e shtretërve dhe do të ulë kostot për trajtimin e pacientëve që nuk kanë nevojë për hospitalizim.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.