Stabilizohen tregjet europiane – Fokusi, lufta në Ukrainë dhe fitimet tremujore të korporatave

Tregjet europiane po qëndrojnë në rritje në pjesën e parë të sesionit të sotëm, pasi tregjet globale po përpiqen të ndërtojnë një moment poizitiv gjatë kësaj jave, duke e lënë pas paqëndrueshmërinë e javës së kaluar.

Indeksi pan-Europian STOXX 600 e ka nisur ditën në rritje me 0.4%. edhe tregjet aziatike janë mbyllur në rritje gjatë sesionit të kaluar, ndërsa në Wall Street indekset kryesore vijuan tendencën në rënie edhe në sesionin e kaluar. Lufta në Ukrainë vijon të jetë faktori kyç për besimin e tregjeve, sidomos në Europë. Tashmë luftimet janë përqëndruar në lindje dhe juglindje të vendit.

Sipas informacioneve, rreth 260 luftëtarë ukrainas, përfshirë këtu edhe ata që ishin plagosur rëndë, u evakuuan nga uzina e çelikut, Azovstal, një ndër bastionet e fundit të forcave ukrainase në qytetin e shkatërruar të Mariupolit. Ndërkohë, me Suedinë dhe Finlandën që njoftuan zyrtarisht synimin për tu bërë pjesë e NATO-s, të gjithë sytë janë te Rusia dhe mënyra se si do të reagojë. Të hënën, presidenti rus, Vladimir Putin, deklaroi se zgjerimi i NATO-s është një problem.

Moska zyrtare ka paralajmëruar se do të ndërmarrë masa, por pa specifikuar se çfarë masash. Gjithashtu, investitorët po presin edhe fitimet tremujore të korporatave dhe të dhënat mbi punësimin në Mbretërinë e Bashkuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.