Stabilizohet tregu i naftës – Pritshmëri të larta se OPEC do të shtyjë uljen e prodhimit

Çmimet e naftës po tregtohet të qëndrueshëm në sesionin e sotëm, pas dy ditësh në rënie të konsiderueshme. Rritja e prodhimit në Shtetet e Bashkuara të Amerikës është zbehur nga pritshmëritë se, OPEC do të shtyjë marrëveshjen për uljen e prodhimit, përtej marsit të vitit të ardhshëm. Nafta Brent e Londrës po tregtohet pranë 62 dollarëve për fuçi, ndërsa nafta Bruto amerikane po tregtohet pranë 55.3 dollarëve për fuçi.

Pavarësisht qëndrueshmërisë në sesionin e sotëm, nafta Brent dhe nafta Bruto kanë humbur rreth 4% të vlerës, që nga java e kaluar. “Ndërkohë, rezervat e naftës në SHBA u rritën për të dytën javë me radhë, me 1.9 milionë fuçi, gjatë javës që u mbyll në 10 nëntor, në totalin e 459 milionë fuçive”, deklaroi Agjencia për Informimin mbi Energjinë.

Në anën tjetër, analistët parashikonin një rritje të rezervave të naftës me 2.2 milionë fuçi. Gjithashtu, edhe prodhimi i naftës në ekonominë më të madhe në botë preku nivelin e 9.65 milionë fuçive në ditë, që do të thotë se, që nga mesi i vitit 2016, prodhimi në SHBA është rritur me 15%.

Por, pavarësisht kësaj, analistët shprehen se, çmimet janë mbështetur gjatë muajve të fundit nga vendimi i OPEC dhe vendeve të tjera prodhuese për të balancuar tregun. Prodhuesit e naftës do të takohen më 30 nëntor dhe pritshmëritë janë të larta për shtyrjen e kësaj marrëveshjeje deri të fund të vitit 2018.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.