Stanjacioni i biznesit të vogël, Sejko: Duhen sipërmarrje më inovative dhe konkurruese

Biznesi i vogël në Shqipëri është pak produktiv dhe konkurrues. Duke komentuar gjetjet e raportit të tranzicionit të Bankës Europiane për Rindërtim dhe Zhvillim, Guvernatori i Bankës së Shqipërisë, Gent Sejko, tha se ekonomia shqiptare ka nevojë të zëvendësojë shumë biznese joproduktive me kompani më inovative dhe eficiente.

Për t’iu përgjigjur konkurrencës në rritje nga integrimi rajonal dhe europian, Shqipëria duhet të shpejtojë reformat që synojnë formalizimin e ekonomisë, nxitjen e biznesit në sektorët me avantazhe konkurruese dhe zhvillimin e tregut të kapitaleve.

Drejtori i Zyrës së BERZH në Shqipëri, Matteo Colangeli, tha se prioritetet për financime në vendin tonë këtë vit do të kenë sektori energjetik, infrastruktura dhe sidomos mbështetja e sektori privat, përmes projekteve të përbashkëta të financimit me bankat tregtare.

Prioritet këtë vit do të jetë zgjerimi i financimeve për bizneset shqiptare, përmes ndarjes së rrezikut me bankat tregtare. Ne kemi një portofol të konsiderueshëm financimesh për agrobiznesin dhe këtë vit synojmë një zgjerim të kreditimit për këtë segment. Gjithashtu, ne jemi të hapur që edhe jashtë programeve sektoriale, të bashkëpunojmë me bankat tregtare për të ndarë rrezikun e financimit në projekte të veçanta, në çdo sektor apo në çdo lloj produkti të huadhënies.

Në raportin e tranzicionit 2017-2018, BERZH identifikon dinamikën e dobët të sektorit privat, në veçanti të biznesit të vogël, si një nga problemet kryesore për ekonominë shqiptare.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.