Strategjia e MFP – Denaj: Garantimi i transparencës dhe efikasitetit të financave publike

Gjatë ditës së sotme  Ministria e Financave dhe Ekonomisë zhvilloi aktivitetin lançues të konsultimit publik të Rishikimit Afatmesëm të Strategjisë së Menaxhimit të Financave Publike.

Ministrja e Financave dhe Ekonomisë, Anila Denaj ishte gjithashtu e pranishme në takim si edhe Ambasadori i BE në Shqipëri, Luigi Soreca dhe gjithë aktorët e përfshirë në zbatimin e kësaj reforme.

Eventi në fjalë kishte për qëllim prezantimin e gjetjeve të procesit të Rishikimit Afatmesëm të Strategjisë së Menaxhimit të Financave Publike 2014-2020, prezantimin e vizionit për vitet e ardhshme të reformës si edhe thirrjen publike për kontributin e të gjithë partnerëve të zhvillimit, duke përfshirë dhe organizatat e shoqërisë civile, për përgatitjen dhe finalizimin e Strategjisë së Rishikuar të Menaxhimit të Financave Publike 2019-2022.

Forcimi i pronësisë së aktorëve të përfshirë në zbatimin e kësaj reforme, në mënyrë që të garantohet zbatimi i përgjegjshëm i menaxhimit të financave publike, ishte një prej mesazheve kryesore që u transmetua në këtë event.

Denaj gjatë fjalës së saj tha qëllimi i Strategjisë së rishikuar 2019-2022 është konsolidimi i mësimeve të nxjerra, rezultatet dhe marrëveshjet e arritura pas shqyrtimin afatmesëm, si dhe të sigurojë një kornizë dhe udhërrëfyes që do të udhëheqë përmirësimet në rezultatet e Menaxhimit te Financave Publike për periudhën deri në dhjetor 2022.

“Vizioni i strategjisë së reformës së MFP është të sigurojë një sistem financiar publik që promovon transparencën, llogaridhënien, disiplinën fiskale dhe efikasitetin në menaxhimin dhe përdorimin e burimeve publike për përmirësimin e ofrimit të shërbimeve dhe zhvillimin ekonomik” -tha Ministrja.

Duke vazhduar më tej Denaj theksoi se objektivi i përgjithshëm i strategjisë së reformës së MFP është arritja e një buxheti më të balancuar dhe të qëndrueshëm me një raport të reduktuar të borxhit nëpërmjet menaxhimit më të fuqishëm financiar dhe kontrollit dhe proceseve të auditimit, ku zbatimi i buxhetit lidhet siç duhet me politikat e qeverisë.

Soreca nga ana tjetër, theksoi rëndësinë e një administrate që funksionon mirë dhe jep shërbime cilësore për qytetarët, si një kusht thelbësor për çdo vend kandidat që aspiron të futet të Bashkimit Europian. Ai tha se reforma në menaxhimin e financave publike nuk është vetëm përgjegjësi e Ministrisë së Financave dhe Ekonomisë, pasi kjo e fundit ka një rol udhëheqës, por çdo institucion si ministri linje, njësi vendore, institucion i pavarur, dhe e gjithë shoqëria, ka një rol për të kryer në menaxhimin e financave publike.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.