Strategjitë e pazakonta të Musk për Tesla-n – Po investon 5 mld USD në një fabrikë të re në Kinë
Elon Musk vijon të hartojë strategji të pazakonta herë pas here për Tesla-n. Pas përpjekjes për të zgjeruar rrjetin me hapjen e një qendre të re inxhinierike në Greqi, Musk tashmë po planifikon të investojë 5 miliardë dollarë në fabrikën e re në Kinë, sipas Bloomberg. Kina është tregu i dytë më i madh i Tesla-s pas Shteteve të Bashkuara të Amerikës.
Arsyet e Musk për të prodhuar automjete Tesla në Kinë me sa duket janë të qarta: duke bërë këtë, ofron qasje më të mirë në tregun e brendshëm dhe lehtëson efektet e tarifave të vendosura për klientët në Kinë.
Makinat e Tesla-s kushtojnë më shumë në Kinë sesa në SHBA për shkak të kostos së transportit detar dhe tarifave 40% të vendosura kohët e fundit nga lufta tregtare SHBA-Kinë.
Fabrika e Shangait nuk do ta çlirojë plotësisht Tesla-n nga shpenzimet që lidhen me importin e makinave në Kinë. Kompania do të mund të shmangte tarifat vetëm duke formuar një ndërmarrje të përbashkët me një kompani vendase ose në rast të një leje speciale nga Pekini.
Kina ka qenë në radar të Tesla-s për një kohë të gjatë. Muajin e kaluar, kompania tha se shpreson të prodhojë 500 mijë makina në vit në Kinë. Shitjet e makinave elektrike në Kinë u dyfishuan në 2017, duke tejkaluar 1 milionë për herë të parë.
Tesla po ‘studion’ po ashtu një vend europian për ndërtimin e një fabrike të re, e cila parashikohet të prodhojë makina dhe bateri. Ndërkohë, kompania prodhoi vetëm 88 mijë automjete në gjysmën e parë të vitit 2018.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.