“Studentët nuk e njohin tregun e punës” – Biznesi: Është kosto për ne, njohuritë teorike nuk mjaftojnë
Studentët të cilët mbarojnë një fakultet nuk janë gati për tregun e punës kjo sepse njohuritë e tyre praktike janë të pamjaftueshme. Ky është pretendimi i disa përfaqësuesve të biznesit, të cilët shprehen nëpërmjet televizionit SCAN, se përveç ambientit jo shumë favorizues për sipërmarrjet, mungesa e fuqisë punëtore është kthyer në një sfidë për të cilën zgjidhjet duket se janë të vështira.
Industria fason, bujqësia dhe turizmi vuajnë më së shumti mungesën e punonjësve, po ankesa janë vërejtur në të gjithë sektorët. Megjithatë bizneset shprehen se janë të gatshëm për të ofruar mundësi intershipi por kjo për shumicën e rasteve nuk kryhet kundrejt një pagese.
Më herët Ministrja e Arsimit Besa Shahini, gjatë ceremonisë së “Programit Kombëtar të Praktikave të Punës” program tashmë në vitin e tij të 4-rt, e ka vlerësuar si një sfidë sigurimin e tyre nëpër kompanitë private duke nënvizuar se po punohet për të rritur interesin e sipërmarrjeve.
Shahini ka pohuar se e kundërta ndodh me institucione publike, në nivel qendror e lokal ku vetëm gjatë këtij viti, në kuadër të “Paktit për Universitetin”, u koordinuan mbi 2000 pozicione të lira për praktikën e punës.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.