“Studentët të rikthehen në mësim”, UT: Do zëvendësohen orët për përfundimin me sukses të vitit
Rektorati i Universitetit të Tiranës ka thirrur studentët ti rikthehen procesit mësimor, pas një periudhe të gjatë ndërprerjeje për shkak të protestës, kjo me qëllim për të përfunduar me sukses këtë vit akademik.
Përmes një njoftimi për mediat ky institucion shpreh shqetësim dhe përgjegjshmëri për rritjen e cilësisë së arsimit të lartë, përmirësimin e kushteve, uljen e kostove dhe përjashtimin nga tarifa e studentëve.
Pas mbledhjes së zhvilluar, rektorati i UT vendosi për plotësimin e programit mësimor për vitin akademik nëpërmjet zëvendësimit të orëve mësimore, shtyrje të afatit të pagesës së tarifave, shtyrjen e procedurave të marrjes së dokumentacionit për përfitim burse si edhe ngritjen e grupit të punës me një përfaqësi nga studentët.
Ky grup pune pritet të angazhohet në përgatitjen dhe realizimin e një plani veprimi në shërbim të përmirësimit të veprimtarisë të Universitetit të Tiranës në tërësi dhe në veçanti me çështjet që lidhen me mësimdhënien, kërkimin shkencor si edhe administrimin dhe transparencën e të gjithë aktivitetit të institucionit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.