Studentët vijojnë protestën, shtohen kërkesat

Studentët kanë nisur marshimin drejt ministrisë së Arsimit, për të vijuar edhe sot protestën, duke deklaruar se nuk do të ndalen deri në realizimin e kërkesave të tyre.

Një ditë më parë qeveria plotësoi një nga kërkesat e tyre, shfuqizimin e pikës katër në VKM-në 288, e cila parashikonte se studentët do të paguanin edhe për kreditet e provimeve të mbartura.

Ndërkohë ata kanë edhe tre kërkesa të tjera zyrtare, si përgjysmimi i tarifës së studimit, përmirësimi i kushteve të konvikteve, dhe e fundit Bordi i Administrimit të ketë numër të barabartë votash mes fakulteteve dhe Ministrisë së Arsimit, duke shtuar një̈ përfaqësues nga studentët në bord. Kërkesa këto të parashtruara nga grupi negociues me Ministrinë e Arsimit.

Protesta u nis më datën 4 dhjetor nga studentët e Arkitekturës dhe Urbanistikës, ndërkohë ditë pas dite ia janë bashkuar edhe studentët e fakulteteve të tjera.

Këtë të premte janë bërë bashkë, studentët e fakultetit të Shkencave të Natyrës, e Infermierisë, Mjekësisë dhe universitetit të Bujqësorit. Po përveç Tiranës, po protestohet edhe nga studentët Elbasanit, Korçës, Shkodrës dhe Vlorës.

Nga ana tjetër Universiteti Bujqësor i Tiranës ka vendosur edhe 10 kërkesa të tjera.

Kërkesat e reja të studentëve të Universitetit Bujqësor të Tiranës:

1- Pajisja e të gjithë studentëve me Kartën e Studentit brenda vitit akademik 2018 – 2019;

2- Rritja e buxhetit për arsimin me 8% të GDP-së, buxheti për vitin 2019;

3- Reduktimi tarifës me 30% për vitin akademik 2018 – 2019;

4- Reduktimi tarifës me 50 % për vitin akademik 2019 – 2020;

5- Arsim publik falas për vitin akademik 2020 – 2021;

6- Përmirësimi i kushteve të konvikteve të Universitetit Bujqësor të Tiranës;

7- Mbështetja e aktiviteteve dhe projekteve të studentëve me një fond të veçantë, nivel fakulteti;

8- Mbështetje e studentëve për kërkime shkencore;

9- Mbështetje e studentëve të doktoraturës me fonde për kërkimin shkencor;

10- Rritja nga 10% në 40% e peshës totale të votës së studentëve për të zgjedhur kandidatët për dekan/rektor, dhe rritja e përfaqësisë së studentëve në senatin akademik me 20%.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.