Studentët vijojnë rezistencën – Protestë përpara Kryeministrisë për 8 kërkesat

Kauza e studentëve ka sfiduar reshjet e shiut dhe qindra të rinj kanë vijuar protestën përpara godinës së kryeministrisë në ditën e 11 të saj. Krahasimisht me ditët e tjera të protestës numri i studentëve ka qenë më u ulët për shkak të kushteve atmosferike.

Ata kërkojnë nga qeveria realizimin e 8 kërkesave të panegociueshme të cilat do të mundësojnë një arsim më cilësor përmes shfuqizimit të ligjit të arsimit të lartë,  ambiente më të mira në universitete, tarifa më të ulëta, ambiente më të mira në konvikte.

Studentët vijojnë të jenë të vendosur se nuk do të ketë asnjë dialog dhe negociata me kryeministrin Edi Rama, pa i plotësuar më parë të 8 pikat, pavarësisht kërkesave të vazhdueshme nga kryeministri. Disa studentë kanë qëndruar gjatë gjithë natës përpara kryeministrisë, ndërsa një ditë më parë kanë kërkuar që të mblidhet Parlamenti dhe të diskutohet për çështjet e tyre.

Ndërkaq kryeministri Edi Rama u ka bërë apel të vazhdueshëm për dialog duke u shprehur se është dakord me të gjitha pikat, por pa marrë paraprakisht vendimet e kërkuara. Në përgjigje të kërkesave të studentëve, Senati Akademik i Universitetit Bujqësor të Tiranës ka marrë një vendim i cili u jep zgjidhje problematikave të adresuara, që nga transparenca, tek kartat e studentëve, vendimmarrja dhe rishikim e kostove të shkollimit.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.