Studimet me kosto të ulët – Shpenzimet mujore në disa vende arrijnë deri në 800 euro

Austria, Norvegjia, Finlanda dhe Gjermania janë vendet ku mund të studiosh pa shumë shpenzime.

Ndryshe nga Shqipëria ku kostot për arsim janë të larta krahasuar me nivelin e të ardhurave ku vetëm për nivelin bachelor ato variojnë nga 25 deri ne 40 mijë lekë.

Këto shtete kanë kosto të ulët për arsimin dhe shpenzimet e studentit përfshirë ato të akomodimit dhe jetesës përllogariten deri në 800 euro në muaj.

Tarifat e shkollimit në vendet e Europës janë të ndryshme, ato luhaten në nivelet nga 250 euro në Francë deri në 16,000 euro në Danimarkë apo 20 mijë paund në Angli.

Kostot e jetesës nuk kanë ndryshime të mëdha midis vendeve që janë pjesë e BE-së, luhatje më të mëdha ka në ato vende që nuk janë pjesë, ku në Zvicër kostoja mesatare vjetore fillon nga 17,250 euro deri në 27,600 euro, që e përkthyer në kosto mujore do të përllogaritej tek 1,500 euro deri 2500 euro.

Destinacionet  në vendet europiane zënë 50% të totalit dhe kjo shpjegohet me traditën që kanë këto vende në arsimim.

Forumi Ekonomik Botëror ka listuar 10 universitetet më të mira në Europë, ku kryeson ai i Oksfordit dhe ka një dominancë totale të shkollës britanike, me 7 shkolla.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.