Studimi: 14% e të rinjve europianë janë në rrezik depresioni
Keqtrajtimi, ndjenjat e margjinalizimit dhe mungesa e arsimit dhe punësimit i shtyjnë të rinjtë europianë në prag të një krize të shëndetit mendor, sipas një studimi të ri nga Eurofound, e cila është Agjencia e BE-së për përmirësimin e kushteve të jetesës dhe të punës. Sipas studimit, Suedia (41%) kryeson listën e të rinjve “në rrezik depresioni” bazuar në udhëzimet e OBSH, pasuar nga Estonia (27%) dhe Malta.
Në nivelin e përgjithshëm të BE-së, 14% e rinisë së BE janë në rrezik depresioni. 4% e njerëzve ndërmjet moshës 15 dhe 24 vjeç tashmë vuajnë nga depresioni kronik. Raporti përdor të dhënat e Anketës Europiane të Cilësisë së Jetës (EQLS) nga viti 2016, dhe të dhënat ekzistuese nga niveli kombëtar dhe ai europian. Ai thekson ndikimin e krizës ekonomike tek të rinjtë.
Në Suedi, për shembull, kishte një rritje prej 60% të numrit të fëmijëve që gjetën veten në strehimin e emergjencave ndërmjet viteve 2011 dhe 2017. Në Holandë, numri i fëmijëve të pastrehë nga 2013 në 2018 u rritën me 60%. Në vende si Franca, Danimarka dhe Irlanda, një në tre persona të pastrehë është një fëmijë. Përpos kësaj, tre nga 10 fëmijë ishin në rrezik varfërie.
Përveç arsyeve financiare, depresioni ndahet edhe sipas gjinive sipas studimit. Vajzat e reja kanë më shumë gjasa të vuajnë nga simptoma depresive se sa djemtë e rinj. Për shembull, Danimarka, Gjermania, Irlanda dhe Franca e vërtetuan më së miri këtë fakt. Të rinjtë janë një grup në rënie në Europë dhe raporti thotë se duhet të tregohet kujdes për të ofruar mbështetje për ta. Ai thotë se të rinjtë europianë duhet të kenë më shumë qasje në mjedise sociale dhe shërbime shëndetësore, mendore dhe fizike. (Euronews)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.