Studimi/ Mali Everest ka humbur 2000 vjet akull në më pak se 3 dekada!

Akullnaja më e lartë në malin më të lartë në botë po humbet çdo vit akull me vlerë dekadash për shkak të ndryshimeve klimatike të shkaktuara nga njeriu, tregon një studim i ri.

Gjetjet shërbejnë si një paralajmërim se shkrirja e shpejtë e akullnajave në disa nga pikat më të larta të Tokës mund të sjellë përkeqësim të ndikimeve klimatike, duke përfshirë ortekët më të shpeshtë dhe tharjen e burimeve të ujit nga të cilat rreth 1.6 miliardë njerëz në vargmalet malore varen për pije, vaditje dhe hidrocentrale.

Akulli që iu deshën rreth 2000 vjet për t’u formuar në akullnajën e Colit Jugor është shkrirë në rreth 25 vjet, që do të thotë se është holluar rreth 80 herë më shpejt se sa është formuar.

Ndërsa shkrirja e akullnajave është studiuar gjerësisht, pak vëmendje shkencore i është kushtuar akullnajave në pikat më të larta të planetit, argumentojnë studiuesit në studimin e botuar në Nature Portfolio Journal Climate and Atmospheric Science.

Studiuesit thanë se gjetjet jo vetëm që konfirmuan se ndryshimet klimatike me burim njerëzor arritën pikat më të larta në Tokë, por gjithashtu po prishnin ekuilibrin kritik që ofrojnë sipërfaqet e mbuluara me borë.

Hulumtimi tregoi se sapo akulli i akullnajës u ekspozua, ai humbi rreth 55 metra akull në një çerek shekulli. Studiuesit vërejnë se akullnaja është shndërruar nga një grumbull dëbore në akull kryesisht dhe se ndryshimi mund të kishte filluar që në vitet 1950. Por humbja e akullit ka qenë më intensive që nga fundi i viteve 1990.

Ky transformim në akull do të thotë se akullnaja nuk mund të reflektojë më rrezatimin nga dielli, duke e bërë shkrirjen e saj më të shpejtë.

Simulimet e modeleve tregojnë se për shkak të ekspozimit ekstrem ndaj rrezatimit diellor, shkrirja ose avullimi në këtë rajon mund të përshpejtohet me një faktor prej më shumë se 20, pasi mbulesa e borës të shndërrohet në akull. Një rënie në nivelet e lagështisë relative dhe erërat më të forta janë gjithashtu faktorë.

Përveç të gjitha ndikimeve mbi ata që varen nga uji nga akullnajat, shkalla aktuale e shkrirjes do t’i bënte gjithashtu më sfiduese ekspeditat në malin Everest, pasi bora dhe akulli mbulohen më pak gjatë dekadave të ardhshme. CNN

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.