Subjektet që hedhin mbetje inerte, Klosi: Heqje e lejes së ndërtimit për ata që shkelin ligjin

Ministri i Mjedisit dhe Turizmit, Blendi Klosi, dhe nënkryetari i Bashkisë së Tiranës, Arbian Mazniku kanë inspektuar depozitimet e paligjshme të mbetjeve inerte në liqenin në Kodër Mëzez. Sipas ministrit dhjetëra biznese janë penalizuar me gjoba nga Inspektorati i Mjedisit, ndërsa paralajmëroi masa edhe më të ashpra.

“Inspektorati i Mjedisit së bashku me Inspektoratin e bashkisë kanë penalizuar mbi 30 subjekte të cilët janë kapur në shkelje të ligjit, por kjo është një masë e pamjaftueshme. Do të vazhdojmë me masa më të ashpra duke shkuar deri në heqjen e lejes për ndërtim të këtyre subjekteve pasi nuk mund të tolerojmë që mjedisi të trajtohet si mall pa zot. Sot në Tiranë kjo punë nuk mund të zgjidhet vetëm me Inspektoratin e Mjedisit apo vetëm me inspektorët e bashkisë. Ne duam shumë policinë e rendit të jetë në krye të kësaj detyre, por më shumë se kaq duam qytetarët të cilët nuk do të duhet të lejojnë që biznese të papërgjegjshme qofshin të mëdha apo të vogla,me emër të madh apo edhe të panjohura të bëjnë këtë veprimtari kriminale”, u shpreh Klosi.

Nënkryetari i Bashkisë, e konsideroi këtë një problematikë të vjetër të gjithë qytetit të Tiranës, e cila do të marrë zgjidhje falë Planit Urbanistik.

“Nëpërmjet Planit Urbanistik të qytetit, të miratuar 1 vit më parë, por edhe një sërë rregullimesh të tjera që janë bërë, është një çështje e sistemuar dhe tashmë duhet vetëm që aktorët e caktuar, të cilët duan ta kryejnë këtë lloj aktiviteti, apo i duhet ta kryejnë këtë lloj aktiviteti, të ndjekin rregullat dhe procedurat e duhura dhe të mos i hedhin mbetjet si mall pa zot në natyrë, sepse natyra është e të gjithëve ne, nuk është një çështje të cilën dikush mund ta ndërrojë, ta prishë apo t’i marrë dhe t’i hedhë dherat kudo që gjykon”, u shpreh Mazniku.

Inspektorati Shtetëror i Mjedisit dhe inspektorët e bashkisë po vijojnë inspektimet në të gjithë qarkun e Tiranës, për të evidentuar të gjitha pikat apo hotspotet e krijuara në vite nga puna dhe aktiviteti i pakontrolluar i subjekteve që merren me gjenerimin, transportin dhe venddepozitimin e mbetjeve inerte.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.