Subvencionet e avionëve në Europë – Vendos OBT. Autorizon zyrtarisht SHBA-në që të tarifojë BE

Organizata Botërore e Tregtisë autorizoi në mënyrë zyrtare Shtetet e Bashkuara që të vendosin tarifa deri në 7.5 miliardë dollarë mallra europianë të importit, prej subvencionimit të avionëve Airbus nga qeveritë e Bashkimit Europian.

Organi i zgjidhjes së kësaj çështjeje i Organizatës, i përbërë nga përfaqësues nga 164 vende anëtare, i dha mundësinë Washingtonit që të kundërpërgjigjet ndaj Bashkimit Europian dhe shteteve që prodhojnë Airbus si Britania, Franca, Gjermania dhe Spanja.

E Drejta e SHBA për të vendosur tarifa mund të ishte mohuar vetëm nëse të gjithë vendet anëtare do votonin kundra.   Ambasadori tregtar i Shteteve të Bashkuara, Dennis Shea,  tha se Washingtoni preferon ende që të negociojë një marrëveshje.

“Kjo mund të ndodhë vetëm nëse BE përfundon subvencionet ndaj Airbus”, tha ai. Organizata Botërore e Tregtisë zbuloi se Airbus dhe rivali amerikan, Boeing, kanë marrë miliarda dollarë subvencione të jashtëligjshme, sipas padive që kanë zgjatur për 15 vite.

Vendimi për rastin e Boeing në SHBA, pritet të ndodhë në fillim të vitit 2020.  SHBA kanë deklaruar se do vendosin 10% tarifa ndaj avionëve Airbus dhe 25% ndaj një liste të gjatë të produkteve, përfshirë verën franceze, uiskin skocez dhe djathin në të gjithë kontinentin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.