Subvencionet në bujqësi – Basha nga Devolli: Do rikthejmë mbështetjen për fermerët
“Në vend që milionat e eurove t’i japin për një copë rrugë, duhet që ti japin për të subvencionuar fermerët dhe prodhimin e përpunimin.” Kështu u shpreh kreu i demokratëve Lulzim Basha në një takim me fermerët e Devollit.
“Vit pas viti laku ka ardhur duke u ngushtuar në fytin e fermerëve shqiptarë. Dhe tani jemi përballë riskut që të prodhoni e të mos i shisni dot prodhimet ose t’i lini djerrë. Nga puna juaj varet buka e familjes tuaj dhe atyre që punojnë në bujqësi. Fermeri, fshati dhe bujqësia janë braktisur. Buxheti vit pas viti nuk ka ndryshuar për bujqësinë. Prodhimet e fqinjëve të subvencionuar konkurrojnë fermerët shqiptarë. Dy janë problemet: mungesa e fondeve, braktisja totale. PD synon rikthimin e skemës së subvencioneve. Shteti duhet të ndihmojë jo vetëm me pika grumbullimi por edhe pika përpunimi” – ka thënë Basha.
Sipas Bashës, 22 milionët e dhënë për inceneratorët do të mjaftonin për të subvencionuar prodhimin e mollës për të gjithë Shqipërinë. Më tej kreu i opozitës ka kërkuar mobilizimin e fermerëve që ti jepet zgjidhje situatës ekonomike.
Entela Barjamaj /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.