Suedia, Italia dhe Luksemburgu, shprehen skeptikë për krijimin e një banke zhvillimi në BE

Italia, Luksemburgu dhe Suedia kanë vënë në dyshim nevojën e një institucioni të ri për të financuar projekte zhvillimi jashtë BE-së, raporton Luxemburg Times. Raporti i paraqitur ministrave të financave në mbledhjen e Këshillit të Çështjeve Ekonomike dhe Financiare (Ecofin) në Luksemburg të enjten paraqiti tre opsione të mundshme për ministrat e BE-së.

E para është shndërrimi i Bankës Europiane për Rindërtim dhe Zhvillim (EBRD) ose Bankën Europiane të Investimeve (EIB) në një Bankë të Zhvillimit të BE-së. Një tjetër është krijimi i një institucioni të ri, në pronësi të përbashkët të EBRD, EIB dhe institucioneve kombëtare. E treta është mundësia e funksionimit përmes institucioneve ekzistuese.

Ministri i financave i Italisë, Roberto Gualtieri tha se zgjedhja e një institucioni të ri “ndoshta duhet të përjashtohet”, ndërsa ministrja e financave e Suedisë, Magdalena Andersson e përkrahu zëshëm këtë pikëpamje duke thënë se ngritja e një institucioni të tillë do të merrte kohë për tu bërë funksional. Përveç tyre edhe Pierre Gramegna i Luksemburgut propozoi më shumë shpenzime në zhvillim sesa investime të reja në një institucion të ri.

Europa është ofruesi më i madh i ndihmës për zhvillim por Kina së fundmi është duke i bërë hije në disa rajone të caktuara, përfshirë këtu edhe Afrikën, duke shpërndarë kredi të buta për projekte infrastrukturore. (neweurope)

1. S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.