Suedia, shoqëria që përdor më pak para’ cash në planet – Autoritetet nisin të shqetësohen
Tabelat që shkruajnë “nuk pranohen paratë cash” po bëhen një pamje gjithmonë e më e zakonshme nëpër dyqanet dhe restorantet në Suedi, teksa të gjitha pagesat po shkojnë drejt digjitales dhe celularit.
Megjithatë, shpejtësia me të cilën po zhduket paraja fizike ka nisur të shqetësojë autoritetet. Një studim i gjerë i legjislacionit të bankës qendrore po mbikëqyr situatën dhe pritet të nxjerrë një raport në fillim të verës.
“Nëse ky zhvillim ndodh shumë shpejt, mund të bëhet shumë e vështirë për të mbajtur infrastrukturën e menaxhimit të parave. Mund të futemi në një spirale negative që kërcënon infrastrukturën e parasë cash. Janë këto lloj problemesh që po vështrojmë më tepër ”, shprehet Mats Dillen, deputeti në krye të rishikimit parlamentar.
Suedia konsiderohet gjerësisht si shoqëria që përdor më pak paranë cash në planet. Shumica e degëve të bankave në vend kanë ndaluar së pranuari monedhat fizike; shumë dyqane, muze dhe restorante tashmë pranojnë vetëm pagesat plastike apo me celular.
Por kjo ka një tjetër anë negative, që prek veçanërisht të moshuarit, të cilët nuk kanë akses në shoqërinë digjitale.
Vitin e kaluar, shuma e parasë në qarkullim ra në nivelin më të ulët që prej vitit 1990. Një studim i përvitshëm i publikuar në janar tregoi se vetëm 25% e suedezëve përdorin para për të blerë të paktën një herë në javë, ndërsa në vitin 2013 ishin 63%. Studimi zbuloi gjithashtu se plot 36% e njerëzve nuk përdorin kurrë para, ose paguajnë me to vetëm një ose dy herë në vit.
Si përgjigje, banka qendrore po vlerëson mundësinë e nxjerrjes së një forme zyrtare të valutës digjitale, një e-krona. Ideja është që e-krona të funksionojë si një shtesë e parasë fizike dhe jo ta zëvendësojë atë plotësisht.
Guvernatori i Bankës Qendrorë të Suedisë propozon gjithashtu se duhen detyruar bankat që t’u japin para cash klientëve.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.