Takimi Bushati- Kotzias – Palët dakordësohen për hapat që do të merren në vijim

Ministrat e Jashtëm të Shqipërisë dhe Greqisë, Ditmir Bushati dhe Nikos Kotzias, zhvilluan një takim në Tiranë, në kuadër të dialogut intensiv të mekanizmit dypalësh, për zgjidhjen e çështjeve mes dy vendeve.

Ministrat shqyrtuan progresin e shënuar që prej takimit të Janarit të mbajtur në Korçë, që është materializuar në një sërë zhvillimesh pozitive. Bushati dhe Kotzias u dakordësuan për hapat e mëtejshëm që do të ndërmerren në muajt e ardhshëm, në funksion të avancimit të procesit dhe gjetjes së zgjidhjeve të mirëpranuara për çështjet ende në diskutim.

Ministrat i kushtuan një vëmendje të posaçme punës për finalizimin e Dokumentit të Partneritetit Strategjik, në përputhje me vullnetin e palëve për të forcuar dimensionin evropian të marrëdhënieve shqiptaro-greke.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.