Takimi i 5-të i Këshillit Kombëtar të PAK, Xhaçka: Deri në fund të 2016, 101 të punësuar. Sa përfituan nga grantet në 10 bashki
Është mbajtur sot në Tiranë, takimi i pestë i Këshillit Kombëtar për aftësinë e Kufizuar, ku e pranishme ka qenë edhe ministrja e Mirëqenies Sociale dhe Rinisë, Olta Xhaçka, e cila u shpreh se në një hark kohor prej 2 vitesh e gjysmë janë bërë pesë takime të këtij Këshilli.
“Besoj se është për tu përshëndetur fakti që në një periudhë prej 2 vite e gjysmë janë organizuar 5 takime të këtij Këshilli, duke respektuar në këtë mënyrë jo vetëm zbatimin e ligjit, por në radhë të parë dëgjimin e zërit të grupeve të interesit të cilët janë ata që ndjejnë më mirë se kushdo se çfarë efekti kanë politikat që ne hartojmë e zbatojmë, në jetën e tyre të përditshme”.
Xhaçka pohoi gjithashtu se deri në fund të 2016, raportohen 101 të punësuar në radhët e PAK nëpërmjet programeve të posaçme të punësimit në zyrat e punës. Sipas ministres në raport me një vit më parë, shifra e punëmarrësve të kategorisë PAK, rezulton 2 herë më i lartë.
“Në kuadër të integrimit dhe përfshirjes sociale, por edhe për shkak të rritjes së kërkesave për punësim nga PAK, në zyrat e punësimit, një program i posaçëm për nxitjen e punësimit të PAK i miratuar nga Qeveria në vitin 2014 ka filluar të japë efektet e veta. Që nga momenti që programi filloi të zbatohet deri në fund të vitit 2016 janë punësuar 101 PAK në subjekte të ndryshme, kryesisht të moshave deri në 40 vjeç dhe me arsim të mesëm. Në raport me një vit më parë, shifra e punëmarrësve të kategorisë PAK, rezulton 2 herë më i lartë. Gjithashtu nga statistikat e inspektimeve të kryera në subjektet ekonomike janë evidentuar 125 punëmarrës me aftësi të kufizuar ku 42.4% janë femra”.
Gjatë fjalës së saj Xhaçka tha se në vitin 2016 janë trajnuar falas 60 persona me aftësi të kufizuar në qendrat publike të formimit profesional në profesione të ndryshme.
“Besoj shumë, se arsimi dhe formimi profesional do të ishte një alternativë e shkëlqyer për të rinjtë me aftësi të kufizuar, me qëllim që ata të bëhen të aftë për tu integruar në tregun e punës. Gjatë vitit 2016 janë trajnuar falas 60 persona me aftësi të kufizuar në qendrat publike të formimit profesional në profesione të ndryshme”.
Po ashtu ministrja e Mirëqenies Sociale nënvizoi se nëpërmjet granteve të financuara në 10 bashki të vendit kanë përfituar 35 familje që kanë persona me aftësi të kufizuar.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.