Takimi i G7 në Bari – Përsëriten premtimet për këmbimin valutor dhe mbrojtjen kibernetike

Liderët e shtatë ekonomive kryesore në botë premtuan se do të bashkëpunojnë kundër krimit kibernetik dhe përdorimit të këmbimit valutor për avantazh tregtar.

Ministrat e Financave dhe guvernatorët e Bankave Qendrore të Shteteve të Bashkuara, Kanadasë, Japonisë, Francës, Gjermanisë, Italisë dhe Britanisë, kanë diskutuar mbi ekonominë botërore, luftën kundër financimit të terrorizmit, sigurinë kibernetike dhe taksat.

Komunikata e liderëve tregoi se 7 vendet do të përdorin të gjithë mjetet e politikave; fiskale, strukturore dhe monetare, për të nxitur rritjen ekonomike. Liderët thanë gjithashtu se do të fuqizojnë bashkëpunimin mbi kërcënimet kibernetike, të tilla si sulmi global që infektoi mijëra kompjutera në 100 vende të botës ditën e Premte.

Deklarata tregoi se politikat fiskale duhet të përdoren për të nxitur krijimin e vendeve të punës ndërkohë që e mbajnë borxhin publik në nivele të qëndrueshme, ndërsa politikat monetare duhet të nxisin aktivitetin ekonomik pa shkaktuar rritje të fortë në çmime.

“Rikomfirmojmë se politikat tona fiskale dhe monetare kanë qenë dhe do të qëndrojnë të orientuara drejt arritjes së objektivave të brendshëm, duke përdorur instrumentet përkatës, dhe ne nuk do të përdorim kursin e këmbimit për avantazh tregtar”, thanë liderët në takimin në Bari, Itali.

Por ndryshe nga takimi i kaluar, këtë fundjavë nuk u përmend tregtia e lirë dhe refuzimi i proteksionizmit, gjë që reflekton presionet nga SHBA ku presidenti Donald Trump është treguar skeptik mbi marrëveshjet e tregtisë së lirë.

“Ne e pranojmë se sulmet kibernetike po bëhen një kërcënim gjithnjë e më i madh për ekonomitë tona dhe se duhen politika të gjera ekonomike për ti trajtuar”, thanë liderët pas sulmit të ditës së Premte.

Ata bënë thirrje për praktika të përbashkëta që të gjejnë në mënyrë të shpejtë cënueshmëritë në sistemin financiar botëror dhe theksuan rëndësinë e sigurisë kibernetike te firmat financiare.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.