Takimi i Popullit – Festivali 4-ditor në Danimarkë ku njerëzit takohen me udhëheqësit e tyre politikë

Politikanët shpesh akuzohen se nuk janë në kontakt me njerëzit e zakonshëm. Por në Danimarkë, gjërat janë pak më ndryshe. Për katër ditë në vit, danezët mund të qëndrojnë dhe të komunikojnë me politikanët, madje edhe me kryeministrin në festivalin Folkemodet (Takimi i popullit).

Çdo muaj qershor, njerëzit shoqërohen me politikanët, zyrtarët e qeverisjes vendore dhe drejtuesit e kompanive dhe organizatat joqeveritare në festivalin që zhvillohet në Bornholm, ishulli më lindor i Danimarkës. Në këtë festival marrin pjesë të gjitha partitë politike ku kanë mundësi të mbajnë fjalime apo të debatojnë për çështje aktuale.

Në festivalin e realizuar këtë vit, morën pjesë mbi 100 000 pjesëmarrës në mbi 3000 evente të organizuara, duke përfshirë leksione, debate, shfaqje. Çdo gjë në këtë festival është falas.

Festivali, i themeluar në vitin 2011, u frymëzua nga Java Suedeze Almedalen, e cila feston 50 vjetorin e saj në 2018. Përveç fjalimeve, shumë liderë biznesi zhvillojnë diskutime edhe mbi çështje të tilla si infrastruktura, ndryshimet klimatike, çështjet energjitike apo problemet sociale.

Njerëzit kanë mundësi që të bëjnë pyetje të vështira dhe të paraqesin madje edhe kërkesa për politikanët. Sipas New York Times, temat më diskutuara këtë vit ishin shëndeti, demokracia si dhe të rinjtë.

Përveç kësaj, 82% e pjesëmarrësve u shprehën se kishin fituar njohuri të reja për çështjet politike, dhe 62% thanë se festivali i kishte frymëzuar ata që të bëheshin më aktivë në politikë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.