Takimi i Trump nuk pritet mirë – Republikanët kritikojnë mbrojtjen e Rusisë për ndërhyrjet në zgjedhje

Performanca e presidentit amerikan Donald Trump në konferencën e përbashkët me liderin rus Vladimir Putin në Helsinki, është pritur gjerësisht me kritika në Shtetet e Bashkuara, përfshirë nga vetë partia e tij republikane.

Ndërsa pyetej nëse beson te agjencitë e inteligjencës në SHBA, që kanë arritur në përfundim se Rusia ka ndërhyrë në zgjedhjet e vitit 2016 për të mposhtur demokraten Hilary Clinton, Trump tha se nuk është i bindur që ka qenë shkaktare Moska.

Drejtori i inteligjencës kombëtare, Dan Coats,  reagoi menjëherë duke thënë se nuk ndan të njëjtin këndvështrim me presidentin. “Ne kemi theksuar në vlerësimet tona ndërhyrjen e Rusisë në zgjedhjet e vitit 2016 dhe përpjekjet e tyre për të cënuar demokracinë tonë”, deklaroi ai.

Ish drejtori i Agjencisë Qendrore të Inteligjencës (CIA),  John Brennan, e quajti performancën e Trump si të “pabesë”, ndërsa senatori republikan John McCain tha se takimi ishte një gabim “tragjik”, pavarësisht se republikanët e tjerë u treguan më të kujdesshëm. Republikani kryesor në Shtëpinë e Përfaqësuesve, Paul Ryan, u tregua i matur në komentet e tij, por shtoi se Trump duhet të “marrë në konsideratë se Rusia nuk është një aleat”.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.