Taksa 100 % për produktet e Serbisë e Bosnjes- Do të hiqet apo do të mbahet pas zgjedhjeve në Kosovë?

Mbajtja ose pezullimi i vendimit për taksën prej 100 për qind ndaj prodhimeve të importuara nga Serbia dhe Bosnjë e Hercegovina, të cilën e ka vendosur Qeveria e Kosovës, tashmë në dorëheqje, do të jetë një nga sfidat kryesore për partitë politike, të cilat potencialisht synojnë të marrin pushtetin pas zgjedhjeve të parakohshme parlamentare, të cilat do të mbahen më 6 tetor.

“Megjithatë, partitë politike, të cilat do të garojnë në këto zgjedhje, të paktën në mënyrë deklarative, vazhdojnë të mos shprehin vullnet për të pezulluar vendimin për këtë taksë, në rast se arrijnë t’i fitojnë zgjedhjet dhe mandatin për të qeverisur me vendin” shkruan “Evropa e Lirë”.

Për më shumë, shumica e tyre, raportin me Serbinë e shohin mbi parimin e reciprocitetit.

Zëvendëskryeministri në dorëheqje, Enver Hoxhaj, njëherësh nënkryetar i Partisë Demokratike të Kosovës, thotë se qasja e këtij subjekti politik nuk ka ndryshuar lidhur me taksën. Sipas tij, në rast se PDK-ja merr mandatin për të qeverisur vendin pas zgjedhjeve, vendimi për taksën do të vazhdojë të zbatohet.

Lidhja Demokratike e Kosovës mban qëndrimin që taksa ndaj produkteve të Serbisë mund të hiqet vetëm atëherë kur të aplikohen parimet e reciprocitetit.

Rexhep Selimi, anëtar i kryesisë së Lëvizjes Vetëvendosje thekson që ky subjekt politik, në rast se merr mandatin për qeverisjen e vendit, do të aplikojë reciprocitet të plotë tregtar, ekonomik dhe politik, në raport me Serbinë.

Edhe Ahmet Isufi, nënkryetar i Aleancës për Ardhmërinë e Kosovës thotë se në rast se kjo parti fiton mandatin për të qeverisur, nuk do ta ndryshojë vendimin, të cilin e ka marrë lideri i saj, Ramush Haradinaj, kryeministër në dorëheqje i Kosovës.

Më 21 nëntor të vitit 2018, Qeveria e Kosovës, ka marrë vendimin për rritjen në 100 për qind të taksës për mallrat e Serbisë dhe Bosnje Hercegovinës. Ky vendim erdhi vetëm një ditë pasi që Kosova dështoi të anëtarësohet në INTERPOL dhe është parë si një kundërpërgjigje ndaj politikës agresive të Serbisë ndaj këtij anëtarësimi, si dhe lobimit të diplomacisë serbe te vendet e caktuara për tërheqjen e njohjeve të Kosovës.

Artikulli origjinal: https://www.evropaelire.org/a/partite-politike-per-taksen/30148609.html

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.