Taksa e pronës për biznesin – Veliaj: Taksim progresiv, të jetë 0.25% e vlerës së pronës
Bashkia e Tiranës do t’i propozojë Kuvendit ndryshimin e taksës së pronës për biznesin, duke aplikuar taksimin progresiv”. Lajmi u bë me dije nga kryebashkiaku, Erion Veliaj, gjatë Këshillit Konsultativ të Qeverisjes Qendore me atë Vendore, duke theksuar se kjo taksë duhet të jetë 0.25% e vlerës së pronës.
Gjithashtu, Veliaj tha se janë të domosdoshme ndryshime në buxhet për shërbimin zjarrfikës, duke kërkuar që transferta të bëhet në bazë të emergjencave.
“Taksa e pronës do të jetë për qindje e vlerës. Tek familjarët kjo nuk ndryshon, pra s’ka asnjë efekt. Por, tek bizneset, ai që ka më shumë do paguajë më shumë. Pra, milioneri që bën pallatet do të paguajë më shumë se sa ai që ka një furrë buke. Dhe unë besoj se në të njëjtën filozofi të taksimit progresiv, ne nuk mundet që të aplikojmë të njëjtën taksë prone për familjarët, tani si përqindje e vlerës dhe jo si tarifë fikse për metër katrorë. Ndërkohë që ta ulim këtë për bizneset e mëdhaja. Besoj që jemi ende në kohë. Do t’i kërkoj edhe zotit Braçe që drejton Komisionin në Parlament që të adresojë propozimin konkret, është që të jetë 0.25 për qind që të mos kenë bashkitë efekt negativ kur vjen puna te bizneset.”
Veliaj vlerësoi rritjen e transfertës së pakushtëzuar në masën 1% të Prodhimit të Brendshëm Bruto, por sipas tij në vitet në vijim ajo duhet të jetë më e lartë.
“Besoj që një nga vlerësimet ka të bëjë me rritjen e transfertës së pakushtëzuar në 1 për qind të Produktit të Brendshëm Bruto. Sigurisht që ne kemi avokuar që të jetë më shumë se 1 për qind e GDP-së, por vetëm fakti që tashëm është fiksuar si pjesë e të tërës e bën transfertën e pakushtëzuar, pak më të madhe. Do të thotë që secila bashki në bazë të formulës ka një mundësi më të madhe për të financuar nevojat e veta.”
Gjatë takimit, kryebashkiaku kërkoi më tepër kompetenca për qeverisjen vendore edhe në drejtim të aktiviteteve të biznesit që disponojnë leje mjedisore të kategorisë C, duke argumentuar se aktualisht bashkia e ka të pamundur të ndërhyjë për të disiplinuar qytetin.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.