“Taksa progresive rriti varfërinë”, Tabaku: Qytetarët paguajnë 2 mld dollarë më shumë
Taksimi progresiv ka varfëruar më shumë qytetarët shqiptarë. Deputetja e Partisë Demokratike Jorida Tabaku, në një dalje për mediat tha se qytetarët po paguajnë 2 miliardë dollarë taksa më shumë duke përsëritur se vetëm aplikimi i një takse të sheshtë, mundet të ndihmojë rritjen e nivelit të konsumit.
“Sipas të dhënave të publikuara, numri i të varfërve që jetojnë me më pak se 2.5 USD në ditë është rritur me rreth 7 mijë si rezultat i taksës progresive. Por, sipas Bankës Botërore, efektin më të madh negativ kjo taksë e ka pasur tek individët apo familjet që jetojnë me 4 USD në ditë, duke prodhuar edhe më shumë varfëri tek ata të cilët e ndjejnë më shumë rritjen e taksave. Ne besojmë që një taksim i ulët dhe i sheshtë do të ndihmojë sipërmarrjen vendase për të dalë nga vargonjtë e taksimit të padrejtë të vendosur nga qeveria Rama”.
Deputetja e Partisë Demokratike hodhi akuza se taksat e shqiptarët po përkthehen në fitime për koncesionet në llogari të një grushti klientësh të kryeministrit.
“Bizneset e vogla janë futur në skemën e TVSH-së, ndërsa miqtë oligarkë të kryeministrit, për llogari të të cilëve shqiptarëve po u grabitet prona me vendim qeverie, janë përjashtuar nga TVSH-ja. Nga ana tjetër, është rritur tatimi për të ardhurat personale deri në 23 për qind dhe tatimi mbi fitimin, në 15 për qind. Shqiptarët duhet ta dinë se po paguajnë më shumë taksa, rreth 2 miliardë dollarë më shumë në 5 vitet e fundit, për llogari të një grushti klientësh të kryeministrit dhe familjes së tij, për të cilët taksat e shqiptarët po përkthehen në fitime për koncesionet”.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.