Taksat e shqiptarëve në Itali – Impakti fiskal i emigrantëve, paguan 520 mln euro në 2016
2.3 milionë emigrantë, derdhin në total 7.2 miliardë euro në arkat e shtetit italian. Studimi që fotografon impaktin fiskal të emigrantëve tregon se, nga viti 2010 e deri në vitin 2016, taksat që kanë paguar të huajt në Itali janë rritur ndjeshëm, me 13.4%.
Për italianët nuk vlen e njëjta gjë, pasi gjatë së njëjtës periudhë kohore, kontributi i tyre ka rënë me 1.6%. Vetëm gjatë vitit të kaluar, të huajt kanë rritur kontributin e tyre në arkat e shtetit italian me plot 6.4%.
Në vend të parë, për shifrën që i paguajnë shtetit janë rumunët, që janë edhe grupimi më i madh i emigrantëve në Itali. Në vend të dytë ndërkohë qëndrojnë pikërisht shqiptarët, të cilët ndiqen nga marokenët. Por ata që shënojnë rritjen më të madhe janë filipinezët, moldavët dhe indianët. Rumunët përbëjnë 18.1% të taksapaguesve të huaj, dhe shqiptarët 7.3%.
E përkthyer në vlera absolute, kjo shifër tregon se shqiptarët paguan vitin e kaluar plot 520 milionë euro taksa në vendin fqinj. Një tjetër e dhënë interesante, që përfshihet në të njëjtin studim, veç impaktit fiskal, fotografon edhe të ardhurat e emigrantëve.
Mes të lindurve jashtë Italisë, ata që kanë të ardhura në më pak se 10 mijë euro në vit, janë mbi 50%. Për italianët ndërkohë, kjo normë fiksohet nën 30%. Më pak se 2% e atyre që ka lindur jashtë Italisë, deklaron të ardhura në mbi 50 mijë euro. Mes italianëve, kjo normë i tejkalon 5%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.