Taksat që do të ulen në 2019 – 8 ndryshime që përkthehen në barrë më të ulët fiskale prej 1 Janarit

Paketa fiskale 2019 përfshin një sërë ndryshimesh. Por, cilat janë të gjitha taksat që pritet të ulen prej 1 Janarit të vitit të ardhshëm? Së pari, është ajo mbi dividentin, që do të ulet nga 15% që ishte më pare, në 8%.

Sipas Ministrisë së Financave dhe Ekonomisë, kjo ulje do të prekë drejtpërdrejtë rreth 50 mijë investitorë që grumbullojnë fitime nga aksionet në vendin tonë. Një tjetër risi është ajo për tatimin mbi të ardhurat personale. Kufiri i  taksimit me 23% do të rritet, nga 130 mijë lekë në 1500 mijë lekë, ç`ka përkthehet në 15 mijë individë që do të përfitojnë nga një tatim mbi të ardhurat më i ulët.

Këto të dyja janë ndryshimet më thelbësore në paketën fiskale të 2019, që do të ndihen drejtpërdrejtë në xhepat e disave. Ndryshime të tjera ndërkohë, përfshijnë uljen  e taksimit për ambalazhet plastike, me 2/3, si dhe me 50% të taksës për ambalazhet e qelqit.

Një tjetër risi është ajo e përjashtimit nga Tatimi mbi Vlerën e Shtuar të importit të lëndëve të para farmaceutike, si dhe përjashtimi nga TVSH i makinerive bujqësore sipas një liste të caktuar. Edhe taksa për reklamat nga televizionet do të ulet në 6% nga 10% që është aktualisht.

Sa i përket akcizës, pas 1 Janarit do të eliminohet tërësisht akciza për fishekzjarrët, llambat, dhe bateritë. Në tërësinë e tyre këto do të jenë të gjitha lehtësitë që qeveria ka parashikuar për vitin e ardhshëm fiskal dhe që nuk i prekin të gjithë, por vetëm grupe të caktuara.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.