“TAP” fillon mikro-tunelin – Nisin punimet për veprën 1.5 km të gjatë
Gazsjellësi Trans Adriatik në Shqipëri ka nisur edhe zyrtarisht punimet për ndërtimin e një mikro-tuneli 1.5 kilometra të gjatë në zonën e Çorovodës. Kjo fazë nisi me një ceremoni të posaçme, ku i pranishëm ishte dhe Zv.Ministri i infrastrukturës dhe energjisë, Enis Aliko, si dhe Kryetari i Bashkisë së Çorovodës, Nesim Spahiu; Menaxheri i Projektit TAP për Shqipërinë; Karl Roberts.
Zëvendës Ministri i Infrastrukturës dhe Energjisë, Enis Aliko, theksoi rëndësinë që ka projekti TAP për ekonominë shqiptare: “Ndërtimi i këtij mikro-tuneli është vepra e parë e këtij lloji në Shqipëri, si pjesë e një investimi kaq të rëndësishme si gazsjellësi TAP”, tha ai.
Menaxheri i TAP në Shqipëri, Karl Roberts u shpreh se, TAP është një pjesë shumë e rëndësishme e Korridorit Jugor të Gazit që do të mundësojë gazifikimin e Ballkanit perëndimor dhe do të ofrojë një burim alternativ gazi për Evropën. Mikro-tuneli do të ndërtohet duke përdorur teknologjinë më të fundit duke respektuar mjedisin.
Mikro-tuneli do të përbëhet nga dy mikro-tunele me gjatësi respektive 560 metra dhe 600 metra dhe do të ketë diametër të brendshëm prej 1.8 metrash. Punimet për përfundimin e mikro-tunelit janë parashikuar që të zgjasin rreth katër muaj dhe do të krijojë rreth 50 vende të reja pune.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.