“TAP” merr “OK” – Këshilli i Shtetit në Itali: S`ka shkelje, të vijojnë punimet

Këshilli i Shtetit dhe Ministri i Ambientit në Itali i kanë dhënë dritën jeshilë gazsjellësit Trans-Adriatik për të vijuar punimet në ndërtimin e 8 kilometrave të gazsjellësit në rajonin e Puglia-s.

Punimet ishin pezulluar përkohësisht rreth 10 ditë më parë me kërkesë të prefektit të Lecces si pasojë e përplasjeve mes banorëve të komunës së Melendugno-s me punëtorët e TAP.

Banorët kundërshtonin shpërnguljen e përkohshme të rreth 211 rrënjëve ullinj. Prefektura ndërkohë pezulloi punimet duke kërkuar qartësi nga Ministria e Ambientit. Përgjigja tashmë ka ardhur dhe duket se është e prerë, çka nuk lë më vend për dyshime; TAP në Puglia do të ndërtohet.

“Asnjë kthim prapa në implementimin e TAP. Autorizimi është dhënë dhe puna duhet të vazhdojë“, deklaroi Ministri italian i Ambientit. TAP ka deklaruar se është i gatshëm të fillojë menjëherë punimet.

Këshilli i shtetit ndërkohë, me vendimin numër 1392 që mban datën 27 mars 2017, ka vendosur se projekti respekton rregullat ambientale, duke rrëzuar kështu apelin e prefekturës së Lecce-s dhe atë të komunës së Melendugno-s.

Palët kundërshtonin kështu ndërtimin e gazsjellësit duke pretenduar se do të dëmtonte ambientin e zonës.

Gazjellësi Trans-Adriatik, i gjatë 878 kilometra e që do të kalojë nëpërmjet Shqipërisë, do të përfundojë pikërisht në Itali, në rajonin e Puglia-s, duke bërë të mundur më pas furnizimin e Europës perëndimore me gazin azer.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.