Tapitë e tokave bujqësore, ashpërsohen rregullat – S’marrin pronësinë AMTP-të në truall ndërtimi, plazh, rërë apo brenda infrastrukturave publike
Të gjitha aktet e marrjes në pronësi të tokave bujqësore (AMTP) përpara vitit 2020 do t’i nënshtrohen verifikimeve përpara se të regjistrohen në Kadastër, ndërkohë që një pjesë e mirë e tyre rrezikojnë të mos kualifikohen për përfitimin e tapive. Përmes një vendimi që mban datën 24 dhjetor 2020, Këshilli i Ministrave ka përcaktuar procedura të detajuara për regjistrimin në regjistrin kadastral të aktit të marrjes së tokës në pronësi lëshuar përpara hyrjes në fuqi të ligjit nr.20/2020; për saktësimin e kufijve, të paraqitjes grafike dhe të sipërfaqes së AMTP-së; për normimin e sipërfaqes shtetërore shtesë dhe pronës shërbyese, që i kalon në pronësi mbajtësit të AMTP-së; njëherësh edhe regjistrimin e AMTP-ve me mangësi në elementet e formës.
Në vendim specifikohet se nuk do njihet pronësia mbi tokën në rastet kur Sipërfaqja për të cilën disponon AMTP në kohën e lëshimit të tij, nuk ka qenë e llojit: a) truall; b) vepër e infrastrukturës publike; c) rërë bregdetare; ç) plazh; d) sipërfaqe ujore.
Vendimi përcakton se për të evidentuar ndryshimin ose jo të llojit të pasurisë në kohë, ASHK-ja i referohet llojit të pasurisë në datën 1.8.1991. Për verifikimin e llojit të pasurisë në datën 1.8.1991, ASHK-ja do t’I i referohet dokumentacionit të administruar nga Drejtoria e Administrimit të Tokës, si më poshtë vijon: – Librat e tokës; – Librat e ngastrave të fshatit; – Regjistrat apo dokumentacioni ku janë pasqyruar të dhëna dhe tregues për token bujqësore, apo për kategorinë e resursit të tokës gjatë periudhës 29 gusht 1945 deri më 19 shtator 1991; – Hartat kadastrale të afërta me vitin 1991; si dhe – Aktet e organeve publike, nëpërmjet të cilave janë realizuar ndryshime apo kalime të tokës bujqësore në resurse të tjera dhe anasjelltas.
“Nëse rezulton se lloji i tokës së përfituar ka qenë “truall”, “vepër e infrastrukturës publike”, “rërë bregdetare”, “plazh” apo “sipërfaqe ujore”, refuzohet regjistrimi i aktit të marrjes së tokës në pronësi”, përcakton vendimi i Qeverisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.