Tarifat e rrugës së Kombit, takime me banorët në Tropojë – Zv/ministri Shkreli: Lehtësi për përdoruesit e shpeshtë
Ministria e Infrastrukturës dhe Energjisë ka nisur një tur takimesh me banorët qarkut të Kukësit, të cilët preken nga vendosja e tarifave për kalimin në rrugën e Kombit.
Në kuadër të konsultimeve për kontratën koncesionare të mirëmbajtjes së rrugës, zv.ministri i Infrastrukturës dhe Energjisë Artan Shkreli zhvilloi një bashkëbisedim me banorë në qytetin e Tropojës. Shkreli u njoh nga afër me pretendimet e banorëve për tarifën e kalimit në Rrugën e Kombit dhe propozimet e tyre për të zbutur efektin mbi komunitetin lokal.
“Për sa i përket atyre që nuk përdorin makinat private dhe këtu fus njerëz që janë shumë në nevojë, fus studentë, njerëz që marrin transportin publik apo të moshuarit, natyrisht kjo do të ketë një trajtim të veçantë dhe preferencial. Gjithashtu, për përdoruesit e shpeshtë do të shohim një formulë që këta njerëz siç foli dhe zotëria që shkon disa herë në muaj në Tiranë apo që shkojnë shumë herë në vit se nuk është e thënë të shkojnë patjetër dy herë në javë, të krijojmë një fashë për këta njerëz dhe mënyrën si identifikohen ata tek pjesa ku paguan. Do të bëjmë dhe disa matje të tjera për të kuptuar se çfarë do të thotë përdorues i shpeshtë i rrugës”, u shpreh Shkreli.
Shkreli shtoi se qytetarët shqiptarë duhet të mësohen me faktin se praktikat ndërkombëtare do të zbatohen edhe në vendin tonë dhe të pranojnë të mirat apo edhe efektet anësore që ato kanë.
Konsultimet e drejtuesve të Ministrisë së Infrastrukturës dhe Energjisë do të vazhdojnë edhe në bashkitë e tjera të Qarkut të Kukësit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.