Tarifat e Trump bëhen efektive – Përjashtohet BE dhe 6 vende të tjera, Kina kundërpërgjigjet
Presidenti i Shteteve të Bashkuara, Donald Trump, ka përjashtuar përkohësisht 7 vende nga tarifat në importe që janë bërë efektive këtë javë, përfshirë Kanadanë, Meksikën, Bashkimin Europian, Korenë e Jugut, Brazilin, Australinë dhe Argjentinën.
Ky përjashtim do të zgjasë deri më datë 1 Maj dhe pas kësaj date, Trump do të vendosë nëse do t’i përjashtojë në mënyrë të përhershme vendet.
Kancelarja Angela Merkel kishte paralajmëruar se BE do të kundërpërgjigjej nëse Shtetet e Bashkuara nuk ofronin përjashtim.
Për Kanadanë dhe Meksikën, Trump tha se do të gëzojnë përjashtimin nga tarifat nëse arrijnë të rinegociojnë me sukses paktin e tregtisë së lirë të Amerikës së Veriut.
Mbi Korenë e Jugut, presidenti tha se është listuar për shkak të marrëdhënies së fortë me Shtetet e Bashkuara, kryesisht prej angazhimit të përbashkët në zhdukjen e kërcënimit nga Korea e Veriut.
Qëllimi kryesor i tarifave në importe të Donald Trump, është ekonomia e dytë më e madhe në botë.
Përveç çelikut dhe aluminit, Trump nënshkroi një memorandum ekzekutiv për të vendosur tarifa në mallra kinezë, kryesisht në teknologji, që arrijnë në mbi 60 miliardë dollarë.
Kina është kundërpërgjigjur këtë javë, ndërkohë që ministria e Tregtisë propozoi një listë të 128 produkteve amerikane.
Këto mallra amerikanë, që kishin një vlerë në import prej 3 miliardë dollarë në 2017-ën, përfshijnë verën, frutat, tubat e çelikut dhe etanolin.
Këtyre produkteve do t’i aplikohet një tarifrë prej 15%, ndërsa në masën 25% mund të caktohet për mishin e derrit dhe aluminin e ricikluar, sipas deklaratës së ministrisë.
Megjithatë, sipas analistëve, kjo shifër nuk është e rëndësishme ndërkohë që importet nga SHBA këtë vit pritet të arrijnë në 172 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.