Tarifat për kopshtet e çerdhet – Beqiri: Nuk ndryshojnë, 130 dhe 160 lekë në ditë
Prindërve nuk do t’iu duhet të paguajnë këtë vit më shumë për fëmijët e tyre në kopshte dhe çerdhe publike. Pavarësisht investimeve në infrastrukturë, këtë vit tarifat ditore 130 lekë për çerdhet dhe 160 lekë për kopshtet, nuk do të ndryshojnë.
Në një intervistë për televizionin SCAN, drejtoresha e Qendrës Ekonomike të Zhvillimit dhe Edukimit të Fëmijëve, Zhaneta Beqiri, u shpreh se kjo shifër mund të ndryshojë vetëm atëherë kur të vendoset për pasurimin e mëtejshëm të dietës ushqimore, pasi të ardhurat shkojnë vetëm për ushqimin e vogëlushëve, që përzgjidhet nga dietologët.
“Pagesa që bëhet për një fëmijë në çerdhe dhe një fëmijë në kopësht është një tarifë ditore, që do të thotë se nëse fëmija frekuenton në një ditë çerdhen e Tiranës, paguan 130 lekë, ndërsa në kopësht paguan 160 lekë; tarifë që përballon vetëm shpenzimin ushqimor të fëmijëve. A do ndryshojë kjo tarifë? Nëse ne ndryshojmë dietën ushqimore, sepse gjithmonë ushqimi është një element i rëndësishëm, jo vetëm i zhvillimit fizik të fëmijës, por që ndikon edhe në zhvillimin mendor të fëmijës. Dhe ne gjithmonë duam të bëjmë më të mirën për fëmijët tanë, jemi duke punuar me profesionistë dietologë për një dietë edhe më cilësore në çerdhe dhe në kopshtet e Tiranës”, u shpreh Beqiri për SCAN.
Beqiri nënvizoi se zgjerimi i mbi 65 godinave përmes rikonstruksionit dhe ndërtimi i kopshteve dhe çerdheve të reja do të ndihmojë në reduktimin e mbipopullimit, si një ndër problemet e hasura në këto institucione. Sipas drejtoreshës së Qendrës Ekonomike të Zhvillimit dhe Edukimit të Fëmijëve, vitin e ardhshëm priten të shtohen 10 kopshte të reja. Veç kësaj po shikohet edhe mundësia e shtimit të stafeve.
“Rikonstruksioni në total i çerdheve dhe i 29 kopshteve, dhe jemi duke bërë rikonstruksion edhe në 3 kopshte të tjera, ka ndikuar në në dhënien e mundësisë për të shtuar numrin e fëmijëve që frekuentojnë kopshtin edhe çerdhen. Për sa i përket fluksit të aplikimeve, ka rritur fluksin e aplikimeve, sepse rritja e besimit ndaj shërbimit publik ka bërë që fluksi të jetë i madh. Ajo që ne si bashki kemi prioritet është përmirësimi i vazhdueshëm i cilësisë së shërbimit në të gjitha elementët e tij. Absolutisht, paralelisht me të kemi edhe rritjen e kapaciteteve. Dhe kjo është arsyeja që bashkë me shkollat e reja, do të ndërtohen edhe 10 kopshte të reja”.
Beqiri theksoi se gjatë këtyre dy viteve trajtimi financiar për punonjësit është rritur. Rritja është bërë sipas kategorive, deri në 20%.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.