Tarifimi i autostradës, Gëxhalliu: Me këtë taksë nuk e meriton të quhet “Rruga e Kombit”

Vendimi për tarifimin e Rrugës së Kombit vazhdon të sjellë reagime nga pala kosovare. Sipas kreut të Odës Ekonomike të Kosovës, Safet Gërxhalliu,  me taksën e vënë nga qeveria shqiptare rruga nuk meriton të quhet më “Rruga e Kombit”.

“Ky vendim është në kundërshtim me vendimet e qeverisë Rama, pra është kundër bashkimit të shqiptarëve dhe mbledhjeve të përbashkët të dy mbledhjeve Kosovë-Shqipëri. Kjo rrugë ka qenë bashkuese për shqiptarët dhe me këtë taksë që është shumë e lartë, ajo nuk e duhet ta ketë më këtë emër. Nuk jemi kundër pagesës së taksës së rrugës, por kjo që është propozuar dhe miratuar është njëra ndër më të lartat në rajon e Evropë”, tha kreu i ODA-s në RTK.

Sipas tij tani është duke u përfunduar edhe Rruga me Maqedoninë. “Kur të vendoset tarifë duhet të vendoset për alternativë. Është një monopol dhe i detyron kosovarët për të paguar dhe kjo është jashtë normale”, tha ai.

Gërxhaliu deklaroi se Shqipëria e Kosova duhet të dalin me modele për të mirëmbajtur këtë rrugë. “Duhet të kemi dialog, Kosova meriton një trajtim më të mirë nga Shqipëria”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.