Task Forca Antikorrupsion kontrolle në Berat, Durrës e Fier – Masa disiplinore e shkarkime nga detyra të punonjësve të ZVRPP-ve
Zyra e Regjistrimit të Pasurive të Paluajtshme, Berat ka qenë edhe ‘shënjestra’ e Task Forcës Antikorrupsion gjatë kësaj jave. Përmes një deklarate për mediat, ministrja e Drejtësisë Etilda Gjonaj, ka bërë publike edhe masat disiplinore të marra. Kështu, sipas Gjonaj në përfundim të kontrollit janë konstatuar shkelje të afateve për trajtimin e praktikave dhe përpunimit të kërkesave të qytetarëve. Në këtu kushte, për punonjësit e kësaj zyre vendore janë marrë këto masa.
“Vërejtje me shkrim për tre përgjegjës sektori, 2 përgjegjës zone, përgjegjësit të sektori të arkivës dhe administrimit të informacionit si dhe një specialiste të kësaj zyre. Gjithashtu u rekomanduan masa administrative me qëllim përmirësimin e veprimtarisë së zyrës vendore Berat për përmirësimin e cilësisë së shërbimeve të ofruara ndaj qytetarëve.”
Ndërkohë, Task Forca Antikorrupsion ka kryer inspektime edhe në Zyrën e Regjistrimit të Pasurive të Paluajtshme, Durrës, ku është depozituar në Prokurorinë e Rrethit Gjyqësor Durrës kallëzim penal për veprat e dyshuara të “shpërdorimit të detyrës” si dhe të “pastrimit të produkteve të veprës penale”.
Ndërsa, është shkarkuar nga detyra gjithashtu edhe kryetari i Zyrës Përmbarimore Shtetërore në Fier, Arjan Cepele. Sipas ministres, nga inspektimi i kryer rezulton se ka pasur shkelje të disiplinës në punë në mënyrë të përsëritur për veprimtarinë e tij si përmbarues. Po ashtu, janë gjetur shkelje ligjore dhe proceduriale, për mosrespektim të afateve dhe procedurave gjatë ekzekutimit të titujve ekzekutiv.
Por, nuk ka mbetur jashtë ‘radarit’ të Task Forcës Antikorrupsion as IEVP Lezhë, ku janë evidentuar shkelje ligjore 6 punonjës policie pranë këtij institucioni.
“Njëkohësisht gjatë kësaj jave, Shërbimi i Kontrollit të Brendshëm në Ministrinë e Drejtësisë, ka evidentuar shkelje ligjore për 6 punonjës policie pranë IEVP Lezhë, pasi kanë kryer veprime në kundërshtim me legjislacionin në fuqi lidhur me elementët e sigurisë në institucionet penitenciare.
Materialet gjithashtu janë referuar në Prokurorinë e Rrethit Gjyqësor Lezhë, për veprat penale “Shpërdorim i detyrës” dhe “mos marrja e masave për të ndërprerë gjendjen e paligjshme”.
Për të gjashtë punonjësit e Policisë së Burgjeve, ashtu si për shefin e policisë janë marrë masa disiplinore lidhur me përgjegjësinë e tyre administrative.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.