Tatimet do të nisin kontrollet tek bizneset që grumbullojnë, përpunojnë dhe tregtojnë qumësht
Drejtoria e Përgjithshme e Tatimeve ka lajmëruar se do të nisë operacionet konkrete duke ushtruar kontrolle në terren për të gjithë subjektet që kanë aktivitet në sektorin e grumbullimit, përpunimit dhe tregtimit të qumështit dhe pikat ku ato tregtohen.
Në këtë veprimtari, DPT do të mbështetet nga Shoqata e Industrialistëve Ushqimorë, e cila zhvilloi të mërkurën një takim për të zgjidhur problematikat e përbashkëta dhe për të përmirësuar frymën e bashkëpunimit me biznesin.
Në takim, përfaqësuesit e bizneseve që operojnë në këtë sektor shprehën shqetësimet për disa problematika, ku më kryesoret reflektonin gjetjen e një mënyre të thjeshtëzuar të përdorimit të dokumentacionit tatimor nga këta sektorë, lufta kundër informalitetit për eliminimin e subjekteve që ushtrojnë aktivitet të paregjistruar apo me përgjegjësi tatimore fiktive si dhe ata që shmangin marrjen e faturave.
Grupi teknik i Drejtorisë së Përgjithshme të Tatimeve si dhe i Shoqatës së Industrialistëve Ushqimorë pas planit të detajuar, do të ushtrojnë kontrolle në terren për të gjithë subjektet që kanë aktivitet në sektorin e shitjes dhe përpunimit të qumështit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.