Tatimet, shërbim jo vetëm në sportele por edhe në ambientet e bizneseve. Të parët, tatimpaguesit e rinj
Për herë të parë, Administrata Tatimore do të ofrojë shërbimin e saj të kualifikuar, jo vetëm në sportelet e ambjenteve zyrtare, por edhe në vendin e ushtrimit të veprimtarisë së tatimpaguesve.
Përfituesit e parë do të jenë tatimpaguesit e regjistruar rishtazi. Referuar njoftimit zyrtar të Tatimeve, ofrimi i këtij shërbimi do të zgjerohet në një rreth gjithpërfshirës për çdo problematikë me të cilën ata mund të përballen.
“Materialisht, çdo vizitë në ambjentet e tatimpaguesit, do të mbështetet nga një formular i ri, i quajtur “Formulari i Vizitës tek Tatimpaguesi”, miratuar së fundmi nga Drejtori i Përgjithshëm i Tatimeve. Ky dokument i cili do të formalizojë çdo dialog midis inspektorëve të shërbimit dhe tatimpaguesve, paraqitet publikisht për të gjithë tatimpaguesit, bashkëngjitur këtij njoftimi. Çdo tatimpagues, ka mundësi të njihet paraprakisht me këtë guidë të plotë informuese duke vizituar faqen tonë zyrtare” shkruhet në njoftimin e Drejtorisë së Përgjithshme të Tatimeve.
Administrata Tatimore është duke ndërmarrë një sërë nismash për të garantuar rolin e tatimpaguesve, në përmbushjen vullnetare të çdo detyrimi ndaj legjislacionit tatimor. Sipas së drejtës për informim dhe asistencë që rrjedh nga ligji i Procedurave Tatimore, çdo tatimpagues ka të drejtën që, me qëllim kuptimin dhe zbatimin e legjislacionit tatimor, të marrë informacion dhe të asistohet pa shpërblim nga administrata tatimore.
Brenda strukturës së administratës tatimore janë ngritur strukturat përgjegjëse për shërbimin e tatimpaguesve, si dhe është bërë efektiv komunikimi me anë të Qendrës së Thirrjes përfshirë atë live-chat. Rrjeti i shërbimit ndaj tatimpaguesve është funksional në të gjithë sportelet e Drejtorive Rajonale Tatimore dhe shtrihet në të gjithë territorin e vendit. SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.