Tatimet takim me biznesin në Gjirokastër dhe Sarandë. Diskutohet për procedurat tatimore dhe ligjin e faljes

Drejtoritë Rajonale të Tatimeve Gjirokastër dhe Sarandë zhvilluan takime me përfaqësues të ndryshe të bizneseve, ku qëllimi kryesor i takimeve ishte bashkëbisedimi midis tatimpaguesve dhe administratës tatimore, për çështje që lidhen me aksionin kundër informalitetit dhe më gjerë.

“Gjatë diskutimit janë parashtruar çështje parësore që lidhen me përmbushjen e detyrimeve tatimore, ligjin e faljes dhe përmirësimin e komunikimit dypalësh. Pjesëmarrësit u shprehën se lufta kundër informalitetit, është ngushtësisht e lidhur me rregullshmërinë e mbajtjes së të dhënave kontabël e tatimore, nga njëra anë, por dhe me rritjen e cilësisë së shërbimit ndaj tatimpaguesve nga ana tjetër” thuhet në njoftimin e Tatimeve.

Përfaqësuesit e biznesit vlerësuan iniciativën që Administrata Tatimore ka ndërmarrë në lidhje me dëgjimin e opinioneve të tyre dhe u shprehën pozitivisht për bashkëpunimin kundër informalitetit dhe evazionit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.