Tatimet takim me përfaqësuesit e biznesit të Hoteleri Turizëm: Prioritet, mbështetja e biznesit në këtë sektor

Përfaqësuesit e Drejtorisë Rajonale Tiranë zhvilluan një takim me përfaqësuesit e subjekteve në fushën e hotelerisë turizmit dhe shërbimeve. I pranishëm ishte edhe Drejtori i DRT, Dionis Imeraj, i cili tha se prioritet i administratës është mbështetja e biznesit në këtë sektor.

Sipas tij, çdo punonjës i administratës do të vihet në dispozicionin e sipërmarrësve për t’i asistuar në çdo hap të veprimtarisë së tyre. Ai shtoi më tej se administrata tatimore do të vërë para përgjegjësisë ligjore çdo subjekt/ individ që ushtron veprimtarinë në kushte të paligjshme.

“Në këtë sektor administrata tatimore do të ushtrojë kompetencën e saj për të identifikuar dhe vënë përpara përgjegjësisë ligjore të çdo subjekti apo individi që ushtron veprimtarinë në kushtet e paligjshmërisë duke fshehur apo shmangur detyrimet tatimore, kryesisht operatorët që ofrojnë struktura të akomodimit , nëpërmjet faqeve të internetit pa u regjistruar dhe duke përfituar në mënyrë të paligjshme”.

Përfaqësuesit e biznesit të turizmit e cilësuan këtë një problem serioz, që sipas tyre ka krijuar një treg paralel konkurrence të pandershme.

Po ashtu, në këtë takim u diskutuan efektet dhe impakti që ka sjellë ulja e TVSH-së në këtë sektor nga 20 në 6 për qind.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.