Tatimi mbi të ardhurat – DPT: Ja penalizimet për subjektet që dorëzojnë me vonesë vendimin e destinimit të fitimit

Ligji për tatimin mbi të ardhurat ka pësuar një sërë ndryshimesh. Drejtoria e Përgjithshme e Tatimeve sjell në vëmendje të tatimpaguesve edhe rregullimet që janë bërë së fundmi në këtë ligj.

Sipas saj me rëndësi është evidentuar heqja e detyrimit të subjektit ‘Person fizik’ për të dorëzuar vendim për shpërndarje dividenti, pavarësisht përgjegjësisë tatimore, duke qenë se Personi Fizik, sipas konceptit të ligjit tregtar nuk ka personalitet juridik dhe është përgjegjës me të gjitha pasuritë e tij.

Sipas Administratës Tatimore, ndryshimet konsistojnë në dy momente kyçe:

• Personat fizikë nuk duhet të depozitojnë në organet tatimore vendimin e destinimit të fitimit
• Personi juridik, i cili dorëzon me vonesë në organin tatimor vendimin e destinimit të fitimit, penalizohet vetëm me një gjobë prej 10,000 lekë dhe jo më sikundër ka qenë me gjobë 10,000 lekë për çdo muaj vonesë .

Sipas Administratës Tatimore, rregullimet vijnë si nevojë për reflektim e ndryshimeve të bëra në udhëzimin e datës 30 janar 2006 ‘Për tatimin mbi të ardhurat.’

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.