Tatimi mbi të ardhurat mbush arkën! 5.5 miliardë më shumë se plani/ Kush do të paguajë më shumë vitin e ardhshëm?
Tatimi mbi të ardhurat personale të individëve, është zëri që ka kontribuar më së shumti në rritjen e të ardhurave në arkën e shtetit në 11 muaj, pavarësisht performancës negative të financave publike në tërësi. Gjatë periudhës Janar-Nëntor, nga tatimi mbi pagën apo të ardhura të tjera, janë mbledhur afro 43.3 miliardë lekë, apo 5.5 miliardë lekë më shumë se sa ishte planifikuar për këtë periudhë, dhe 14.6 për qind më të larta.
Ndërsa shifra është shumë herë edhe më e lartë se fakti i 2018-së, ku të ardhurat e realizuara ishin në 33.8 miliardë lekë, duke bërë që në 11 mujor, tejkalimi të jetë me 9.5 miliardë lekë.
Duke qenë se ky zë ka pasur realizim dhe mbledhje përtej pritshmërive, ku ka ndikuar ndjeshëm edhe shpërndarja e dividentit, qeveria parashikon që për vitin e ardhshëm të fuqizojë edhe më shumë ndikimin e këtij zëri në buxhet, për shkak të tatimit ndryshe të të dypunësuarit, duke u llogaritur të gjithë të ardhurat nga puna si një pagë e vetme, që do të thotë më shumë pagesa për individët në favor të shtetit.
Kategoria që do të preket nga kjo formulë duke filluar nga viti i ardhshëm, sipas tatimeve, përbën afro 35 mijë individë të dypunësuar, kryesisht si inxhinierë, arkitektë, ekonomistë, pedagogë, etj.
Argument i qeverisë, është që këta punonjës të mos kryejnë evazion dhe të paguajnë në mënyrë të barabartë me ata që kanë paga të larta. Aktualisht të punësuarit paguajnë, 0% për pagën mujore bruto deri 30,000 lekë; 13% për pagën mujore bruto mbi 30,000 – 150,000 lekë; 23% për pagën mujore bruto mbi 150,000 lekë.
Në skemë do të përfshihen edhe ata që janë të dypunësuar, por me paga deri në 30 mijë lekë, të cilët me ligjin aktual nuk paguajnë tatim, ndërsa vitin e ardhshëm do duhet të paguajnë 3900 lekë në muaj taksë mbi pagën, pasi u konsiderohet si 60 mijë lekë.
Detyrim të për të plotësuar deklaratën e të ardhurave do të kenë të gjithnjë punonjësit, pavarësisht nivelit të të ardhurave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.