Tatimi për dhomat në Booking dhe AirBNB – Sa para qarkullojnë, sa individë prek, si do të taksohen
Drejtoria e Përgjithshme e Tatimeve nxori ditën e mërkurë një njoftim shumë të rëndësishëm që prek të gjithë individët e bizneset që japin me qira dhoma apo shtëpi përmes faqeve të internetit.
Sipas DPT, të ardhurat që vijnë nga këto faqe janë të tatueshme, ndërsa personat që ushtrojnë këtë aktivitet janë të detyruar të jenë të siguruar.
Kjo do të thotë se të gjithë pronat e listuara në faqe si Booking apo AirBNB do të duhet tashmë të regjistrohen si biznese dhe të paguajnë kontributet e sigurimeve shoqërore dhe shëndetësore për këdo punonjës apo familjar të përfshirë në aktivitet.
Numri i operatorëve që preken
Sipas të dhënave të disponuara ekskluzivisht nga SCAN, vetëm në dy platformat e mësipërme janë të regjistruara përkatësisht 2784 prona në Booking dhe 2897 prona në AirBNB. Teksa një pjesë e mirë e tyre përfshijnë prona që janë të dyzuara, pra të regjistruara në të dyja portalet, ose një pronar që jep disa prona, përqindja e subjekteve që janë regjistruara në Qendrën Kombëtare të Biznesit llogaritet të jetë shumë e ulët.
Por, edhe nuk ka të dhëna ekzakte për numrin total të këtyre subjekteve, identifikimi i tyre është shumë i thjeshtë nga ana e tatimeve dhe bëhet thjesht me anë të një kërkimi në secilën prej platformave.
Nëse në bazë të hetimit të tatimeve, rezulton se subjekti nuk është regjistruar si operator turistik, atëherë ai duhet të bëjë menjëherë regjistrimin, përndryshe do të penalizohet sipas ligjit.
Shuma e qarkulluar
Me një fitim mesatar prej 60 dollarësh për dhomë gjatë kulmit të muajve të verës, subjektet e regjistruara në AirBNB fituar vetëm për periudhën Qershor-Gusht 2017 rreth 2.3 milionë dollarë. Ndërkohë, për një periudhë 1-vjeçare, fitimi arrin në 3 milionë dollarë, për shkak se shumica e subjekteve, pas muajve të verës nuk listohen më si të disponueshme.
Ndërsa në platformën tjetër, Booking, subjektet shqiptare rezultojnë të jenë më aktive, jo vetëm për tregun e jashtëm, por edhe për atë të brendshëm. 2784 pronat gjatë periudhës së verës kanë patur një normë rezervimi 70%. Pra nga 10 netë kur dhoma ka qenë e lirë, ajo është zënë në 7 netë.
Në bazë të frekuentimit të mësipërm dhe çmimit mesatar për dhomë, SCAN llogarit se nga Booking, subjekt kanë fituar së bashku 7-9 milionë dollarë për periudhën e verës.
Mënyra e taksimit
Në bazë të njoftimit të tatimeve, operatorët informalë, pra që nuk kanë qenë të deklaruar deri më sot, do të regjistrohen si operatorë që ofrojnë struktura të akomodimit, pra të hotelerisë.
Falë një ndryshimi të miratuar në fillim të sezonit veror, operatorët e turizmit paguajnë vetëm 6% TVSH.
Kjo do thotë se, edhe në rast të miratimit të paketës së re fiskale për shtrirjen e TVSH-së tek biznesi i vogël, edhe ato subjekte që kanë një xhiro vjetore më të madhe se 2 milionë lekë, do të paguajnë vetëm 6% Tatim mbi Vlerën e Shtuar dhe jo më 20%.
Megjithatë, pjesa më e madhe e këtyre strukturave nuk pritet të preken nga TVSH-ja, për shkak se janë kryesisht struktura të vogla akomoduese. Ndërsa strukturat më të mëdha, pra hotelet dhe komplekset janë tashmë të regjistruara, por do duhet të deklarojnë çdo të ardhur, ndryshe rrezikojnë pezullimin e licencës.
Ndryshimi që pritet të ketë impaktin më të madh për individët është sigurimi dhe pagesa e kontributeve shoqërore e shëndetësore. Për shkak se shumica e njerëzve të përfshirë në këtë lloj biznesi janë familjarë dhe shpeshherë fëmijët e pronarëve të shtëpisë, në skemën e sigurimeve nuk pritet të hyjnë më shumë se 2 mijë individë.
Këta të fundit do të jenë të detyruar të paguajnë vlerën minimale të kontributeve, e cila për vitin 2017 korrespondon me një kuotë mujore prej 5184 lekësh.
Krahasuar me zgjidhjet që janë bërë nga administratat tatimore të vendeve të tjera, për Shqipërinë formalizimi i strukturave akomoduese online rezulton me një barrë minimale për individët, të cilët në rastin më të madh do të paguajnë vetëm shumën 5184 lekë në muaj për periudhën e ushtrimit të veprimtarisë.
Nëse Shqipëria do të kishte ndjekur shembullin e Italisë, duke i konsideruar të ardhurat nga AirBNB dhe Booking të tatueshme mbi bazën e tatimit mbi të ardhurat personale, kjo do të sillte një tatim prej 13% për shumën nga 30 mijë deri në 130 mijë lekë dhe 23% për shumën mbi 130 mijë lekë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.