Taxhikistani imponon kod veshjeje për banorët – Regjimi përpiqet të shtypë fenë
Presidenti i Taxhikistanit, Emomali Rahmon ka urdhëruar një komision të veçantë të mbikëqyrë kodin e përshtatshëm të veshjes si për burrat, ashtu edhe për gratë në vend. Presidenti i drejtohet veçanërisht hixhabit, veshje të cilën e ka dënuar edhe në të kaluarën, duke nisur nga një fushëta e vitit 2015 e cila i ndalonte punonjësit e administratës të mbanin një veshje të tillë në punë.
“Të veshësh një hixhab dhe të kopjosh verbërisht një kulturë që është e huaj për ne nuk është një shenjë e të paturit standarde të larta morale dhe etike për femrat”, shprehej presidenti asokohe.
Taxhikistani, një ish republikë sovjetike, me rreth 8 milionë banorë është një vend me shumicë muslimane. Rahmon, i rritur vetë si musliman, është laik dhe është përpjekur të reduktojë liritë fetare, duke lidhur fenë më ekstremizmin.
Rahmon është në pushtet prej vitit 1992 dhe me kalimin e viteve është bërë gjithmonë e më autoritarian. Kjo masë duhet parë edhe në kontekstin e përpjekjeve të tij për të shtypur partinë e opozitës Rilindjen Islamike.
Komisioni i ri është ngarkuar me luftën e kësaj kulture aliene. Ai do të dizajnojë rroba duke marrë parasysh traditat taxhike si dhe jetën moderne. Ministria po përgatit veshje kombëtare për gratë, në mënyrë që ato të mos veshin rroba të huaja.
“Askush nuk e di kush fshihet pas atyre mbulesave”, thotë ministri i Kulturës Shamsuddin Omurbekzoda. Ministri sqaron se me aliene ai nënkupton kulturën arabe dhe thotë se nuk duhet përzier me kulturën e vendit.
Përqasja e popullit ndaj fesë ka ardhur në rritje sidomos pas ndarjes së Bashkimit Sovjetik, megjithatë raportet tregojnë se ekstremizmi nuk është një problem real në vend. Edhe ata persona që i përkasin celulave terroriste janë raste të izoluara dhe të pandikueshme nga përpjekjet për laicitet.
Duke u bazuar në këtë mit të krijuar nga vetë ai, presidenti shprehet se “i madhërishmi njihet me mendjen dhe adhurohet me zemër, jo me veshje, hixhabe, turbanë dhe mjekra”.
Deri më tani, përpjekjet e presidentit Rahmon për të modernizuar vendin kanë dështuar. Pas 25 vitesh në pushtet ai nuk ka mundur të sjellë një ndryshim të vërtetë në shoqëri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.