Të 5-tët në Europë për rritjen e çmimeve – IHÇK në 2.2% gjatë nëntorit, ushqimet udhëheqin trendin

Indeksi i harmonizuar i çmimeve të konsumit fiksohet pranë 2.2% për nëntorin, tregojnë të dhënat e fundit nga Instituti i statistikave. Një normë e tillë na vendos në vendin e 5-të në Europë sa i përket shteteve me rritjen më të lartë të çmimeve. Muajin paraardhës ishim në vendin e 4-t në Europë, ndërkohë që pas shpërthimit të pandemisë, vendi ynë ka qenë në krye të kontinentit të vjetër sa i përket rritjes së çmimeve.

Indeksi i harmonizuar i çmimeve të konsumit shërben për të krahasuar ndryshimin e çmimeve të shitjeve me pakicë mes vendeve europiane, për të kuptuar se ku po rriten me ritme më të shpejta çmimet për konsumatorët familjarë. Rritja më  e  madhe  e  çmimeve,  prej 4,7% vërehet  në grupin “Ushqime dhe pije joalkoolike”, pasuar  nga  grupet “Transporti” me 3,1%, “Pije alkoolike  dhe duhan” me 1,6%, “Mallra  dhe  shërbime  të ndryshme” me 1,2%, “Argëtim dhe kulturë” me 1,0 %, “Komunikimi” me 0,5%, “Hotele, kafene dhe restorante” me 0,4 %, etj. Nga ana tjetër çmimet e grupit “Veshje dhe këpucë” regjistrohen në rënie me 0,7 %, pasuar nga grupi “Shëndeti” me 0,2 %.

Në  muajin Nëntor 2020,  ndryshimi  mujor  i  matur  nga  Indeksi  i  Harmonizuar  i  Çmimeve  të  Konsumit rezulton -0,9%.  Ky  ndryshim  është  ndikuar  kryesisht  nga ulja e  çmimeve  të  grupit “Ushqime  dhe  pije joalkoolike” me 2,4%, pasuar nga grupet “Transporti” dhe “Mobilim, pajisje shtëpie dhe mirëmbajtje” me 0,2 % secili. Nga ana tjetër çmimet e grupit “Argëtim dhe kulturë” u rritën me 0,4%, pasuar nga grupet “Veshje dhe këpucë” me 0,3 %, “Pije alkoolike dhe duhan” me 0,1 %.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.