Të 59-tët në “E-commerce” – Renditja e OKB, keq me internetin, mirë me shërbimin postar
Shqipëria mban vendin e 59-të, ndër 144 shtete të ndryshme të botës në drejtim të tregtisë online, që njihet shkurt si E-commerce. Raporti në fjalë përpilohet në mënyrë periodike nga Organizata e Kombeve të Bashkuara.
Në krahasim me vendet e tjera të rajonit, Shqipëria në këtë renditje lë pas vetëm Malin e Zi. Gjithsesi, raporti sqaron se, Shqipëria ka bërë progres të moderuar gjatë dy viteve të fundit.
Indeksi i përgjithshëm përpilohet mbi bazën e disa nën-indikatorëve të tjerë, që nga përhapja e internetit në popullsi e deri te besueshmëria e shërbimit postar.
Sa i përket përqindjes së individëve që e përdorin internetin, me 66%, Shqipëria është vendi që regjistron performancën më të dobët në rajon.
Në nën-indikatorin që i referohet përqindjes së individëve që kanë një llogari, Shqipëria me 38% është jo vetëm e fundit në rajon, por një ndër vendet me performancën më të keqe në nivel global.
Në nën-indikatorin që i referohet besueshmërisë së shërbimit postar ndërkohë, vendi ynë grumbullon 87 pikë, bindshëm më shumë se të gjitha vendet e tjera të rajonit, duke zënë kështu vendin e parë.
Tregtia online, është një tendencë që po njeh rritje të gjerë nëpër botë. Edhe Shqipëria e ka përqafuar këtë tendencë gjatë viteve të fundit, duke shfrytëzuar kështu mundësinë që ofron teknologjia për të blerë me më pak kosto dhe me më shumë prakticitet. Gjithsesi, pengesat duket se janë ende të mëdha, sidomos në drejtim të infrastrukturës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.